Azərbaycan, Bakı, 29 iyun /Trend, müxbir D.Xatınoğlu/
BMT-nin insan haqları üzrə xüsusi məruzəçisinin İran tərəfindən qəbul olunmaması və onun ölkəyə səfərinə icazə verilməməsi bu ölkədə insan haqlarının pozulmasının göstəricisidir. Bunu Sərhədsiz Reportyorlar Təşkilatının (SRT) İran bürosunun rəhbəri Rza Moini Trend-ə deyib.
İran rəsmiləri bildirib ki, İranda BMT-nin insan haqları ilə bağlı xüsusi nümayəndəsini qəbul etməyəcəklər. Ölkənin məhkəmə sisteminin rəhbəri Sadiq Laricani bu barədə açıqlama verərək bildirib ki, İranın siyasəti BMT-nin insan haqları ilə bağlı xüsusi nümayəndəsini qəbul etməməkdir. O əlavə edib ki, BMT ilə İran arasında əməkdaşlıq olsa da, bu əməkdaşlıqdan İran əleyhinə alət kimi istifadə olunur. BMT-nin İnsan Hüquqları Şurası iyunun 17-də Maldiv adalarının keçmiş xarici işlər naziri Əhməd Şəhidini İranda insan hüquqları ilə bağlı xüsusi məruzəçi təyin edib.
SRT-nin İran bürosunun rəhbəri Moini əlavə edib ki, İran BMT-nin xüsusi məruzəçisinə ölkəyə səfər etmək üçün icazə verib-verməsə də məruzə hazırlanacaq. "Xüsusi məruzəçi İranda insan haqları ilə bağlı məruzəni internetdən və digər vasitələrdən istifadə etməklə, hazırda Avropa ölkələrində yaşayan İranda həbs edilmiş şəxslərin ailələri və İran hökumətinə müxalif şəxslərdən məlumat alaraq hazırlayacaq", - Moini deyib.
Onun fikrincə, BMT-nin insan haqları üzrə xüsusi məruzəçisinin İrana səfəri etməsi məruzənin hazırlanmasındakı prosesi asanlaşdıra bilər. "İran bu cür çıxışlar etməklə məruzənin hazırlanmasına bir növ əngəl törətmək istəyir", - Moini bildirib.
2009-cu ildə İranda keçirilmiş prezident seçkilərindən sonra insan haqlarının pozulması ilə bağlı İran tez-tez gündəmə gəlməkdədir. Belə ki, ötən müddət ərzində beynəlxalq təşkilatlar dəfələrlə İranda yaşayan insanların müxtəlif hüquqlarının pozulması və əhaliyə qarşı zor tətbiq olunması ilə bağlı məruzələrlə çıxış ediblər. Bu məsələ BMT-nin İnsan Hüquqları Şurasının, eləcə də digər beynəlxalq təşkilatların İranla bağlı ciddi narahatlığına səbəb olub.
