Azərbaycan, Bakı, 8 aprel /Trend, müxbir İ.İsabalayeva/
Ölkə Prezidentinin sərəncamı ilə Azərbaycanda turistlər üçün onlayn viza sisteminin tətbiqinə başlanılıb. Bunu bazar ertəsi Trend-ə Azərbaycan Turizm Assosiasiyasının sədri Nahid Bağırov deyib.
Onun sözlərinə görə, artıq Azərbaycana gəlmək istəyən turistlər vizaları onlayn qaydada əldə edə bilirlər. Bundan əvvəl isə turistlər viza almaqda çətinliklərlə rastlaşırdılar. Turistlər Azərbaycana viza almaq üçün Azərbaycanın həmin ölkədəki səfirliyinə müraciət etməli idilər.
"Əgər Azərbaycana səfər etmək üçün viza almaq istəyən turist Almaniyanın hər hansı şəhərində yaşayırsa, o, məcburi şəkildə Azərbaycanın Almaniyadakı səfirliyinə getməli və sənədlərini təqdim etməli idi ki, bu da çətinlik yaradırdı", - Bağırov deyib.
O qeyd edib ki, belə hallar sonda çox sayda turistlərin Azərbaycana gəlməsindən imtina etməsinə gətirib çıxarırdı. Bu isə Azərbaycan üçün əlverişli hal deyildi.
"Ancaq artıq onlayn viza rejiminin tətbiqinə başlanılıb. Bu o deməkdir ki, turist heç bir səfirliyə getmədən yalnız öz pasportunun surətini turizm şirkətinə göndərməklə onlayn viza ala bilər", - Bağırov əlavə edib.
O bildirib ki, turistlər onlayn qaydada vizaları 14 iş günü müddətində əldə edə bilirlər. Bağırovun fikrincə, vizaların onlayn qaydada verilməsi Azərbaycana gələn turistlərin sayının artmasına gətirib çıxaracaq.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
