Azərbaycan, Bakı, 30 aprel /Trend, müxbir İlhamə İsabalayeva/
Təhsil naziri Mikayıl Cabbarovun Ümumtəhsil məktəb şagirdlərinin mütaliə vərdişlərinin təkmilləşdirilməsi və onlarda mütaliə mədəniyyətinin formalaşdırılması ilə bağlı tədbirlər barədə imzaladığı əmrdən irəli gələrək Azərbaycan Respublikasının Prezidenti yanında Bilik Fondunun təşkilatçılığı ilə Yasamal rayonu 53 saylı tam orta məktəbdə "Kitab mənim ən yaxın dostumdur" adlı ədəbi-bədii tədbir keçirilib.
Fondun İnformasiya Təminatı sektorundan Trend-ə verilən məlumata görə, tədbirdə uşaq yazarı, professor Zahid Xəlil, dramaturq Əli Əmirli, yazarlar Arzu Soltan, "Sehrli dünya" uşaq jurnalının baş redaktoru Gülzar İbrahimova, Bakı şəhəri üzrə Təhsil İdarəsinin şöbə müdiri Sevinc Rəsulova, Yasamal rayon İcra hakimiyyəti başçısının müavini Təravət Muradova, Humanitar işlər üzrə şöbə müdiri Zöhrab Cəfərov, AMEA-nın Nəsimi adına Dilçilik İnstitutunun əməkdaşı İsmayıl Məmmədli, məktəb direktorları, kitabxana və ev muzeylərinin rəhbərləri iştirak ediblər.
Fondun Yasamal rayonu üzrə nümayəndəsi, 53 saylı orta məktəbin direktoru Firəngiz Həsənova son zamanlar mütaliəyə xüsusi diqqət ayrıldığını, uşaqların kitaba marağının artdığını deyib.
Təhsil Nazirliyinin şöbə müdiri Aydın Əhmədov mütaliənin gənclərin tərbiyəsində və dünyagörüşünün inkişafında rolundan danışıb, uşaqlarda kitaba sevginin formalaşdırılmasında orta məktəblərin qarşısında duran vəzifələrdən söhbət açıb.
Fondun icraçı direktoru Oktay Səmədov rəhbərlik etdiyi qurumun birbaşa missiyası olan maarifçilik fəaliyyətində mütaliənin əvəzsiz olduğunu vurğulayıb. İcraçı direktor Bilik Fondunun kitabların, oxu mədəniyyətinin təbliğatı sahəsində həyata keçirdiyi layihələr barədə məlumat verib.
Tədbirdə şagirdlər tərəfindən el ağsaqqalı Dədə Qorqudun öyüdləri, Azərbaycan ədəbiyyatının görkəmli nümayəndələrindən olan C.Cabbarlı, C.Məmmədquluzadə, M.Ə.Sabirin əsərlərindən nümunələr səsləndirilib, iştirakçılara müxtəlif musiqi nömrələri təqdim olunub.
