Bakı. Trend:
Prezident İlham Əliyev Milli Məclisdəki çıxışında çox önəmli və əhəmiyyətli məsələlərə aydınlıq gətirdi. Hər zaman olduğu kimi bu dəfə də cənab Prezident çox dərin, konseptual bir çıxış etdi. Azərbaycanın Qarabağ zəfəri, bu zəfərə aparan yol, xalqımızın bu dövrdə nailiyyətləri, eyni zamanda xarici siyasətlə bağlı məsələlərə toxundu. Bununla bərabər gələcək planlar barədə öz fikirlərini açıqladı. Hesab edirəm ki, bu gün Azərbaycan cəmiyyətini düşündürən, narahat edən hər bir məsələyə geniş bir formada yanaşdı.
Bunu Trend-ə Milli Məclisin deputatı Ceyhun Məmmədov deyib.
Deputat bildirib ki, Prezident İlham Əliyev Azərbaycanın 20 ildə əldə etdiyi bütün uğurları xatırlatdı. İqtisadiyyatımızın inkişafından tutmuş, torpaqlarımızın azad olunması və digər məsələlər barəsində çox konkret faktlar əsasında fikirlər söylədi.
"Biz müqayisə apardıqda 20 il bundan əvvəlki Azərbaycana baxdıqda, Azərbaycan hansı vəziyyətdə idi? 20 faiz torpağı işğal altında olan, 1 milyon vətəndaşı köçgün düşmüş Azəərbaycan. O Azərbaycan ki, ona deyilirdi sən müharibə edə bilməzsən, sən işğalla barışmalısan. Bir neçə dövlət istisna olmaqla, bütün dünya Ermənistanın yanında idi. Bu gün sözün əsl mənasında cənab Prezidentin rəhbərliyi ilə Azərbaycan bir möcüzə yaradıb. Heç kəsin ağlına gəlməzdi ki, Azərbaycan bu qədər inkişaf edə bilərdi, böyük uğurlara imza atardı. Uğurlarımızdan danışarkən Azərbaycan ordusunun dünyanın 60 ən güclü ordusu sırasında olmasını böyük fəxrlə qeyd etmək lazımdır.
İllər öncə kimlər düşünə bilərdi ki, biz Xankəndini azad edəcəyik? Əslində cənab Prezident bu məsələyə çox geniş şəkildə toxundu. Kimlər güman edə bilərdi ki,həmin o terror yuvasında, Azərbaycan əleyhinə planlar qurulan o yuvada azərbaycan Prezidenti səs verəcək? Azərbaycan heç bir zaman olmadığı qədər ərazilərinə nəzarət edəcək?.
Əslində Azərbaycan uzun müddət böyük səbr və təmkinlə Ermənistanın işğal etdiyi torpaqlarımızdan nə vaxt əl çəkəcəyini gözlədi. Ancaq təəssüflər olsun ki, Ermənistan bu çirkin əməlindən imtina etmədi və danışıqlar prosesini uzatmağa çalışdı. Belə olan halda Azərbaycanın müharibədən başqa çıxış yolu yox idi. Azərbaycan öz torpaqlarını müharibə yolu ilə azad etməli idi. Ermənistan-Azərbaycan münaqişəsi yalnız və yalnız Azərbaycanın ərazi bütövlüyü çərçivəsində öz həllini tapmalı idi. Heç vaxt Azərbaycan xalqı öz ərazisində ikinci erməni dövlətinin yaradılmasına imkan verməyəcəkdi. Bu həm də onu göstərir ki, qərb dövlətləri hər zaman olduğu kimi bu gün də imutasiya ilə məşğuldular. Tarixi saxtalaşdırmaqla məğuldular və daha çox təxribat törətmək barədə düşünürlər. Burada Ermənistan qədər də Qərb dövlətləri məsuliyyət daşıyırlar. Qətnamənin icrası üçün heç bir addım atılmadı, heç bir real tədbir görülmədi və Ermənistana sanksiya tətbiq edilmədi. Əlbətdə ki, Ermənistan bundan istifadə edərək yenə də yeni təxribatlar, yeni işğallar barədə düşünməyə davam edir. Onlar düşünürdülər ki, zamanında Xankəndini, Zəngəzuru bizdən aldılar və indi də Qarabağı bizdən alacaqlar, Azərbaycan xalqı bu tarixi unudacaq. Amma proseslər onu göstərdi ki, Azərbaycan bu tarixi unutmayıb və unutmaq niyyətində də deyil. Əlbətdə ki, Ermənistan sülh barəsində düşünsəydi, torpaqları öz xoşları ilə geri qaytarsaydı, Azərbaycana qarşı təxribatlara davam etməsəydi proses bu qədər uzanmazdı və Ermənistanın bu qədər itkisi olmazdı. Bunu etmədiklərinə görə də bunun əziyyətini çəkməli oldular. Bütün hallarda Azərbaycan üzərinə düşəni edib, edir və edəcək. Bu prosesdə ən çox itirən yenə də Ermənistan özü olacaq.
Cənab Prezidentin xüsusilə də gənc nəslin milli-mənəvi dəyərlərimizə sadiq böyüməsi məsələsi də əsas məsələlər sırasında idi. Bu gün heç şübhəsiz ki, gənclərin formalaşmasında həm məktəblərimiz, həm də ailələrimiz ciddi rol oynayır. Təəssüf ki, bu gün dünyada çox ciddi proseslər gedir. Ailə dəyərlərinin sarsıldılması, tərbiyyə sisteminin pozulmaması üçün müxtəlif qurumlar və müxtəlif təşkilatlar tərəfindən ciddi iş aparılır. Bu gün, xüsusilə də gənclərin milli-mənəvi dəyərlərdən uzaqlaşması, öz soyundan, kökündən soyuması istiqamətində də biz səyləri görürük. Eyni zamanda zərərli dini cərəyanların təriqətlərin təbliği istiqamətində də addımlar çox düşündürücüdür və biz bunu açıq aydın görürük. Hesab edirəm biz ailə dəyərlərinə xüsusi önəm verməliyik.
Bu gün təəssüf ki, Azərbaycan cəmiyyətində boşanmaların sayının sürətlə artmasının şahidi oluruq. Ona görə də biz ailə dəyərlərinin qorunması üçün ciddi çalışmalıyıq. Bu istiqamətdə ciddi təbliğat, maarifləndirmə işləri aparılmalıdır. Bu çox önəmli bir məsələdir və eyni zamanda məktəblərimizin də üzərinə xüsusi vəzifə düşür. Məktəbin işi yalnız əlifba öyrətmək, təhsil vermək deyil. Eyni zamanda məktəbin işi, funksiyası gənclərin sağlam ruhda, sağlam düşüncədə, sağlam təfəkkürdə yetişməsində həm də tövhə verməkdir. Bunun üçün Elm və Təhsil nazirliyi ciddi addımlar atmalıdır. Eyni zamanda Ailə Qadın Uşaq Komitəsi də konkret proqram işləyib, həm ailə dəyərlərimizin qorunması, həm də məktəblərdə təlim-tərbiyə işinin ən yüksək səviyyədə qurulması üçün real addımlar atmalıdır. Çünki bu gün dünyada gedən proseslər fonunda milli mənəvi dəyərlərə bağlılıq, öz kökünə, soyuna bağlılıq xüsusi önəm daşıyan məsələdir. O dövlətlər ki, milli-mənəvi dəyərlərinə malik deyil, onların inkişafı qeyri mümkündür. O mənada bu gün bizim qarşımızda çox mühim tarixi bir vəzifə durur. Bu tarixi vəzifəni biz yerinə yetirmək üçün ciddi çalışıb, real addımlar atmalıyıq", - deyə o bildirib.