Bakı. Trend:
Səhiyyə sisteminin effektivliyini, təhlükəsizliyini və keyfiyyətini təmin etmək üçün tibb mütəxəssislərinin davamlı peşəkar inkişafı zəruri sayılır.
Trend xəbər verir ki, bunu səhiyyə naziri Teymur Musayev Milli Məclisin bu gün keçirilən plenar iclasında “Praktik tibb və ya əczaçılıq fəaliyyəti ilə məşğul olan və ya bu fəaliyyətlə məşğul olmaq istəyən şəxslərin sertifikasiyası Qaydası”nda dəyişiklik layihəsinin müzakirəsi zamanı deyib.
Teymur Musayevin sözlərinə görə, Səhiyyə Nazirliyi tərəfindən təqdim edilən yeni konsepsiya mütəxəssislərin sübuta əsaslanan praktika, müasir texnologiyalar və müalicə protokolları ilə daim tanış olmasına şərait yaradır.
“Davamlı peşəkar inkişaf kliniki qərarvermə və diaqnostika keyfiyyətini artıraraq, vətəndaşlara göstərilən tibbi xidmətin səviyyəsini yüksəldir”, – deyə nazir qeyd edib.
O, həmçinin bildirib ki, bu məqsədlə “Əhalinin sağlamlığının qorunması haqqında” qanuna uyğun olaraq müvafiq dəyişiklik layihəsi hazırlanıb.