Dekabrın 5-də Səbail rayon Məhkəməsində hakim Yusif Kərimovun sədrliyi ilə sabiq səhiyyə naziri, hazırda həbsdə olan Əli İnsanovun iddiası üzrə hazırlıq iclası keçirilib. Bu barədə Trend ə hakim Yusif Kərimov məlumat verib.
Ə.İnsanovun məhkəmə qarşısında qaldırdığı iddia "Az.TV" və "Lider" TV barədədir. Sabiq nazir mülki iddiasını bununla əsaslandırıb ki, həbsindən sonra həmin teleşirkətlər ictimaiyyətə təqdim etdikləri məlumatlarda və nümayiş etdirdikləri kadrlarda onun şərəf və ləyaqətini təhqir ediblər. O, məhkəmədən bu məlumatların təkzib olunmasına və dəymiş mənəvi zərərin ödənilməsinə dair qərar çıxarılmasını tələb edib.
Bir saata yaxın davam edən iclasın sonunda hakim Yusif Kərimov mülki iddia üzrə məhkəmə baxışının dekabrın 20-nə səhər saat 10-na təyin olunması barədə qərar çıxarıb.
