Kazan. Trend:
Qlobal cənub ölkələri arasında əməkdaşlıq inkişaf etməkdə olan ölkələrin böyüməsi və məhsuldarlığını artırmaq üçün əhəmiyyətli potensiala malikdir.
Trend xəbər verir ki, bunu Efiopiyanın baş naziri Abiy Ahmed Ali Kazanda keçirilən “XVI BRİCS” sammitinin "BRİCS plus" formatında ilk plenar iclasında çıxış edərkən bildirib.
“Qlobal Cənub, inkişaf məqsədlərinə nail olmaq üçün qərar qəbul etmək və yeni maliyyə alətləri yaratmaq üçün mövcud imkanlardan istifadə etməyə çalışmalıdır. Qlobal Cənub ölkələri arasında əməkdaşlığın inkişaf etməkdə olan ölkələrin böyüməsi və məhsuldarlığını artırmaq üçün əhəmiyyətli potensialı var. Bu kontekstdə, ticarət səviyyəsinin artırılması, investisiyaların cəlb edilməsi və inkişaf məqsədlərinin maliyyələşdirilməsi üzərində fəal şəkildə işləmək vacibdir”, - o vurğulayıb.
Onun sözlərinə görə, demoqrafik amillərlə əlaqədar artan bazar imkanları, texnoloji irəliləyiş və ticarət həcminin artması fonunda güclənir, bu da bizi bu ümumi prosesin lokomotivi olma perspektivlərini açır: “Bu potensialı reallaşdırmaq üçün ticarət maneələrini aradan qaldırmaq, bazarları inkişaf etdirmək, müvafiq kvotalar müəyyənləşdirmək və ticarət sahəsində imkanların reallaşmasını təmin etmək lazımdır.”
“Efiopiya , Qlobal Cənub ölkələrinin əməkdaşlığının qlobal çağırışların həllinə, sülh və təhlükəsizliyin qorunmasına, yoxsulluğun aradan qaldırılmasına, inkişafın təşviqinə və iqlim dəyişikliyinin təsirləri ilə mübarizəyə əhəmiyyətli töhfə verə biləcəyinə inanır. Bu kontekstdə, ölkəmin BRİCS ilə əməkdaşlığın gücləndirilməsinə, bərabərlik, həmrəylik və qarşılıqlı hörmət prinsipləri əsasında inkişaf etməkdə olan bazarlarla əməkdaşlığa sadiqliyini bir daha təsdiq etmək istərdim”, - Baş nazir yekunlaşdırıb.