Azərbaycan, Bakı, 20 may/ Trend / Azərbaycanın Nəqliyyat Nazirliyi və Cənubi Koreyanın SK C & C Co.Ltd. şirkəti Bakıda nəqliyyat hərəkətinin səmərəli idarə edilməsi sisteminin yaradılmasına dair müqavilə imzalayıblar. Bu barədə Nəqliyyat Nazirliyinin çərşənbə axşamı yayılan məlumatında deyilir. Müqavilə Azərbaycanın nəqliyyat naziri Ziya Məmmədov və SK C & C Co.Ltd. Şirkətinin birinci vitse-prezidenti Yo Yonq Soon arasında imzalanıb.
Araşdırmalara əsasən, belə sistemin tətbiqinin nəticəsində işıqfor və avtobus dayanacaqlarının sayı nizamlanacaq. Bu sistemin yaradılması avtonəqliyyat vasitələrinin hərəkəti, sürəti, dayanacaqlar, nəqliyyat qəzaları, tıxac haqqında və digər hallarda operativ məlumatı mərkəzi dispetçer məntəqəsinə göndərməyə imkan verəcək.
İlkin hesablamalara görə, nəqliyyatın intellektual idarə edilməsi sistemi iki mərhələdə yaradılacaq. Birinci mərhələdə 2008-ci ilin sonunadək bu sistemin paytaxtın mərkəzindən başlayaraq, Heydər Əliyev prospekti istiqamətində Əzizbəyov dairəsinədək tətbiqi nəzərdə tutulur. İkinci mərhələdə sistem bütün paytaxtı əhatə edəcək və bu tədbirlər üçün 2009-cu ilin sonunadək vaxt ayrılıb.
Bakıda belə sistemin yaradılmasında məqsəd bir məntəqədən nəqliyyat sistemini - sərnişin daşınmaları, avtomobil marşrutları, tıxacların təcrid edilməsi və ya ləğv edilməsi, avtomobil dayanacaqlarını idarə etməkdir.
İlkin qiymətləndirmələrə görə, layihənin dəyəri $55-60 mln. təşkil edir. Əvvəllər layihənin dəyərinin $52 mln. olacağı bildirilirdi. Bu vəsaitləri dövlət büdcəsindən cəlb etmək planlaşdırılır. Lakin digər variantlar da nəzərdən keçirilə bilər.
