Azərbaycan, Bakı, 23 may / Trend , müxbir S.Babayeva/ Azərbaycanın Qəbələ rayonunun (Bakının 250 km-də yerləşir) Nic kənd sakinləri Afrika taununun baş qaldırması səbəbindən donuzların kütləvi surətdə məhv edilməsinə görə kompensasiya alıblar. Bu barədə cümə günü Azərbaycanın kənd təsərrüfatı naziri İsmət Abbasov məlumat verib.
"Bunun üçün bütün lazımi sənədlər rayonun İcra hakimiyyətinə göndərilib və İcra Hakimiyyəti tərəfindən sakinlərə dəyən ziyan ödənilib", - deyə nazir bildirib.
Epizotiyaya qarşı xüsusi fövqəladə komissiyanın qiymətləndirməsinə əsasən, Qəbələ rayonunda Nic kəndi sakinlərinə dəyən ziyanın məbləği 1,266 mln. manat təşkil edib.
Nic kəndinin sakinləri kompensasiyanı hökumətin heyvanlar arasında xüsusi olaraq təhlükəli yolxucu xəstəlik, o cümlədən Afrika taununun yayılması zamanı dəyən ziyanın əvəzinin ödənilməsinə dair sərəncamına əsasən alırlar.
Azərbaycanın Kənd Təsərrüfatı Nazirliyi yanında Dövlət Baytarlıq Xidməti Afrika taununun ortaya çıxması səbəbənidən yanvarın 28-də Nic kəndində karantin tətbiq edib. Bu, Azərbaycan ərazisində Afrika taununun ortaya çıxması ilə bağlı ilk faktdır. Karantin martın 28-də kəndin 378 ailəsinin təsərrüfatında saxlanılan 4863 baş donuzun (506 ton donuz əti) məhv edilməsindən sonra aradan qaldırılıb. Kənd sakinləri yalnız bir ildən sonra donuzçuluq təsərrüfatlarını bərpa edə bilərlər.
Donuzların Afrika taunu (Pestis africana suum) - retikul-edotelial sistemin yoluxması ilə xarakterizə edilən kəskin virus xəstəliyidir. Təbii yoluxma sağlam donuzların xəstə və virus daşıyıcları olan heyvanlarla əlaqəsi zamanı baş verir. İnfeksiya yem, otlaq, nəqliyyat vasitəsilə yayıla bilər. İnkubasiya dövrü 2-5 gündür. Müalicə hələ ki, tapılmayıb. Xəstəlik çox sürətlə yayıla bilmək qabiliyyətinə malik olduğu üçün profilaktik tədbirlər xəstə olması güman edilən heyvanların ciddi izolyasiyasına yönəlib.
Ölkədə donuzçuluq təsərrüfatları Qəbələ də daxil olmaqla, Zaqatala, Şəki, Balakən, Gəncə və Bakı ətrafında mövcuddur.
Məqalə müəllifi ilə əlaqə ünvanı: [email protected]
