Azərbaycan, Bakı, 30 may / Trend , müxbir U.İsmayılova/ Xarici şirkətlər iyul ayında Bakıda keçiriləcək I Azərbaycan Beynəlxalq Sığorta Forumuna maraq göstərməyə başlayıb. Bu barədə cümə günü Maliyyə Nazirliyinin dövlət sığorta nəzarəti şöbəsinin müdiri Namiq Xəlilov bildirib.
"Foruma maraq Azərbaycanın sığorta bazarına potensial sərmayədarların marağından xəbər verir", - deyə Xəlilov bildirib.
Azərbaycanda iyulun 10-11-də I Azərbaycan Beynəlxalq Sığorta Forumu keçiriləcək. Forum Maliyyə Nazirliyinin dəstəyi ilə Azərbaycan Sığortaçılar Assosiasiyası tərəfindən təşkil olunacaq. Forumun missiyası Azərbaycanın sığorta bazarı barədə məlumat vermək, sığorta xidmətlərinin beynəlxalq bazarında inteqrasiya proseslərini gücləndirmək, dünya sığorta cəmiyyəti iştirakçılarını birləşdirmək, təcrübə mübadiləsi aparmaq, sığortaçıların işgüzar görüşləri və tərəfdaşlıq münasibətlərini inkişaf etdirməkdən ibarətdir.
Forum Azərbaycanın sığorta bazarının inkişaf tendensiyası, Avropa ölkələrinin sığorta bazarları təcrübəsinin Azərbaycanda sığortanın inkişafında əks olunması məsələlərinə həsr olunacaq.
Forum Azərbaycan sığorta bazarını dünya sığorta şirkətləri üzrə maliyyə sisitemləri və korporativ idarə etmə sistemlərinə təqdim etməyi də nəzərdə tutur. Forumda iri beynəlxalq sığorta və təkrarsığorta şirkətlərinin iştirakı gözlənilir.
Xəlilovun sözlərinə görə, xarici şirkətlərin forumda iştirakı yerli sığorta risklərinin qəbulu üzrə iri şirkətlərlə münasibətlərin inkişafına, sığorta risklərinin qiymətləndirilməsi və nizamlanmasına fəal yardıma imkan yaradacaq.
Azərbaycanda 28 sığorta və bir təkrarsığorta şirkəti fəaliyyət göstərir. Cari ilin yanvar-mart aylarının yekunu üzrə şirkətlərin sığorta haqları 50,80 mln. manat, sığorta ödəmələri isə 8,45 mln. manat təşkil edib.
Məqalə müəllifi ilə əlaqə ünvanı: [email protected]
