Azərbaycan, Bakı, 28 oktyabr/ Trend , müxbir N.İsmayılova/ "Qafqazda baş verən avqust hadisələri Tbilisi Banklararası Valyuta Birjası ilə (TBVB) birgə layihənin realizəsini yubadıb", - Bakı Banklararası Valyuta Birjasının (BBVB) idarəçisi Fərhad Əmirbəyov bildirib.
"İnteqrasiya etmiş ticarət sisteminin yaradılması prosesi bir qədər yubanıb. Bu, son zamanlar Qafqazda baş verən hadisələrin nəticəsi olub. Həmkarlarımızı başa düşürük. Düşünürəm, vaxtı gələndə biz bu məsələyə qayıdacağıq", - Əmirbəyov bildirib.
2007 - ci ildə TBVB ilə imzalanmış əməkdaşlıq protokolunun əsasında birgə illik əməkdaşlıq proqramı hazırlanıb. Proqrama əsasən, 2008 - ci ilin sonuna birjalar ticarət sistemlərinin inteqrasiyası üzrə təkliflər hazırlamalıydılar.
Əmirbəyov hesab edir ki, Bakı və Tbilisi birjaları arasında əməkdaşlıq TBVB-nin texnoloji inkişafını sürətləndirməlidir.
"İlk növbədə, bu birjanın metodoloji inkişafına təsir edə bilər. Belə ki, indiyədək Tbilisi birjası öz ticarətini fiksinq metodu üzrə aparır. Bu isə, çox köhnəlmiş üsuldur, - Əmirbəyov bildirib. - Bakı Birjası texnoloji aspektdəki şəxsi təcrübəsini paylaşır və bazarların ölçüsünü nəzərə alaraq, düşünürəm ki, BBVB - nin təcrübəsi gürcüstanlı həmkarlarımız üçün daha faydalı ola bilər".
Onun sözlərinə görə, ümumi ticarət - hesablama platforması yaradılarsa, iki ölkə banklarının pul bazarlarına qarşılıqlı çıxışını təmin etmək mümkün olacaq. Gələcəkdə Azərbaycanın və Gürücstanın bankları iki ölkənin Milli Banklarından icazə almaqla valyuta bazarlarına çıxış əldə edə biləcəklər.
"İş ondadır ki, pul bazarları inteqrasiyaya daha çox hazırdır", - Əmirbəyov bildirib.
Əməliyyatlar kredit bazarında həyata keçirilərsə, o zaman banklar kreditlər verə və Azərbaycan və Gürcüstanın Milli Banklarından alınmış bank lisenziyaları çərçivəsində müxbir hesablarına malik ola biləcəklər.
Valyuta bazarlarına çıxışa gəldikdə isə, bunun üçün iki ölkə mərkəzi bankları məsləhətləşmələr aparmalıdır. Gürcüstanın nümayəndə heyətinin 2007-ci ilin yayında Bakıya səfəri zamanı bu məsələ üzrə ilkin müzakirələr aparılıb. Nümayəndə heyətinin tərkibinə Tbilisi birjasının rəhbəri, Gürcüstan Milli Bankının nümayəndələri daxil olub.
Müəlliflə əlaqə saxlamaq üçün elektron ünvan: [email protected]
