Azərbaycan, Bakı, 27 aprel / Trend , müxbir İ.Xəlilova /
2008-ci ilin noyabrında Azərbaycan Mərkəzi Bankı (AMB) tərəfindən verilən lisenziya əsasında ölkə bazarına daxil olan Azərbaycan bankı Azfinansbank müxtəlif layihələr əsasında kredit fəaliyyətinə başlamağı planlaşdırır. Bu barədə bankın idarə heyətinin sədri Murad Quliyev bildirib. [Bank rəsmi fəaliyyətə 2009-cu ilin fevralında başlayıb.]
"Hazırda avtomobillərin, orta və kiçik biznesin kreditləşdirilməsi üzrə bir neçə layihə hazırlanır", - deyə Quliyev bildirib.
Avtokreditləşdirmə çərçivəsində, ölkə bazarında olan digər banklardan fərqli olaraq, Azfinansbank rəsmi dilerlərlə işləməyə hazırlaşır. Hətta bu şirkətlərdə bank nümayəndəliklərinin açılması nəzərdə tutulur ki, bu da yerlərdə avtomobil almaq üçün bütün lazımi sənədlərin rəsmiləşdirilməsinə imkan verəcək.
"Hazırda biz işləyəcəyimiz avtodilerlərin müəyyən edilməsi məqsədi ilə və məhz bu texnologiya ilə iş üzrə konkret layihələr hazırlayırıq", - deyə bank rəhbəri bildirib.
Bank ilkin olaraq daxili vəsaitlər hesabına işləməyə hazırlaşır, lakin paralel olaraq xarici borcların cəlb edilməsi üzrə layihə hazırlanır.
"Lakin bu gün dünya maliyyə böhranı şəraitində bununla işləmək bir az çətindir, lakin artıq hazır layihələr var. Belə ki, bu gün artıq AYİB, BMK ilə danışıqlara başlanılıb. Düşünürəm ki, bir və ya il yarım müddət ərzində biz müəyyən nəticələr əldə edəcəyik", - deyə Quliyev bildirib.
Azfinansbank 10 mln. manat nizamnamə kapitalı ilə yaradılıb. 2009-cu ilin sonunadək bankın kredit portfeli 80-90 mln. manat səviyyəsində gözlənilir.
Aprelin 27-nə olan rəsmi məzənnə 0,8034 AZN/USD təşkil edir.
Məqalə müəllifi ilə əlaqə ünvanı: [email protected]
