Azərbaycan, Bakı, 17 iyul / Trend , müxbir N.İsmayılova /
Azərbaycan İqtisadi İnkişaf Nazirliyi yanında Sahibkarlığa Yardım Milli Fondu (SYMF) 2009-cu ilə nəzərdə tutulan dövlət büdcəsindən 37 milyon manat məbləğində ikinci tranş almaq üçün Maliyyə Nazirliyinə müraciət edib. Bu barədə cümə günü fondun icraçı direktoru Şirzad Abdullayev məlumat verib.
2009-cu ilin dövlət büdcəsində SYMF-ə ayrılmaq üçün 74 milyon manat nəzərdə tutulub. 37 milyon manaa həcmində birinci tranşı fond ilin əvvəlində alıb.
2009-cu ildə fondun xətti ilə 130 milyon manat güzəştli kreditin verilməsi planlaşdırılır. Ondan 74 milyon manatı büdcə vəsaitinin, 56 milyon manatı isə əvvəl verilmiş kredit resurslarının payına düşür.
"Bu il fonddan verilməsi planlaşdırılan güzəştli kreditlərin həcmindən 45 milyon manat artıq paylanıb. Qalan 85 milyon manat Milli Fonda daxil olan təkliflərin əsaslandırılmasından asılı olaraq paylanacaq", - Abdullayev deyib.
İyulun 17-nə olan rəsmi məzənnə 0,8041 AZN/USD təşkil edir.
Məqalə müəllifi ilə əlaqə ünvanı: [email protected]
