Azərbaycan, Bakı, 25 avqust / Trend , müxbir Ü.İsmayılova /
"2008-2015-ci illərdə Azərbaycanda əhalinin ərzaq məhsulları ilə etibarlı təminatı üzrə Dövlət Proqramı çərçivəsində ötən ilin dördüncü rübü və bu ilin birinci yarısında bütün mənbələrdən altı hüquqi və fiziki şəxsə tərəvəzlərin yetişdirilməsi üzrə istixanaların inkişafı üçün 775 min manat ayrılıb", - çərşənbə axşamı rəsmi mətbuatda yerləşdirilmiş müsahibəsində kənd təsərrüfatı naziri İsmət Abbasov deyib.
"Həmçinin 22 fermerə yeni meyvə təsərrüfatlarının bərpası, becərilməsi və meyvələrin ixracının təşviqi üçün 1,44 milyon manat ayrılıb", - nazir bildirib.
Onun sözlərinə görə, proqram çərçivəsində 71 nəfərə ət istehsalı məqsədi ilə heyvandarlığın inkişaf etdirilməsi üçün 4,8 milyon manat ayrılıb. İntensiv ət təsərrüfatının inkişafı və yaradılması, süd istehsalı üçün 650 min manat, həmçinin müasir, rəqabət qabiliyyətli quşçuluğun yaradılması və inkişafı məqsədi ilə 12 fermerə 1,47 milyon manat ayrılıb.
Nazir həmçinin qeyd edib ki, göl balıqçılığının inkişafı üçün səkkiz nəfərə 552 min manat, arıçılığın inkişafı üçün dörd nəfərə 121 min manat ayrılıb.
"Fermerlər və kənd təsərrüfatının müxtəlif sahələri ilə məşğul olan şəxslərə ayrılan vəsaitlər güzəştli şərtlərlə və uzun müddətə verilib", - nazir deyib.
Onun sözlərinə görə, kənd təsərrüfatı məhsullarının istehsalının artırılması və kənd əhalisinin miqrasiya prosesinin dayandırılması üçün 5,44 min nəfərə heyvandarlığın inkişafı üçün 9,222 milyon manatlıq, bitkiçiliyin inkişafı üçün 677 fermerə isə 763 min manatlıq mikrokreditlər verilib.
Azərbaycanda ərzaq təhlükəsizliyi üzrə tədbirlərin maliyyələşdirilməsi üçün ilk dəfə 2009-cu ildə dövlət büdcəsindən 60 milyon manat ayrılıb. Kənd təsərrüfatının kreditləşdirilməsi üçün dövlət büdcəsində 10 milyon manat nəzərdə tutulub.
2007-ci ildən başlayaraq, güzəştli kreditlər aşağıdakı səlahiyyətli agent-banklar tərəfindən paylanır: Texnikabank, Turanbank, Rabitəbank, Muğanbank, Zaminbank, Bank of Azerbaijan, Gəncəbank, Azərbaycan Sənayə Bankı və qeyri-bank İcraçı Kredit Agentliyi (İKA).
Büdcə vəsaitləri hesabına mikrokreditlər min manata qədər məbləğdə iki il müddətinə, kiçik kreditlər 1-20 min manat və orta kreditlər - 20-50 min manat həcmində üç il müddətinə, böyük kreditlər 50-200 min manat həcmində beş il müddətinə verilir. Kreditlər üzrə dərəcə Sahibkarlığa Yardım Milli Fondunda olduğu kimi yeddi faiz səviyyəsindədir.
Avqustun 25-nə olan rəsmi məzənnə 0,804 AZN/USD təşkil edir.
Məqalə müəllifi ilə əlaqə ünvanı: [email protected]
