Azərbaycan, Bakı, 26 avqust / Trend , müxbir Ü.İsmayılova /
Azərbaycanlı sahibkarlar öz imkanlarını sentyabrda Koreyada xüsusi tikinti sərgisində nümayiş etdirəcəklər. Bu barədə çərşənbə günü Azərbaycan Milli Sahibkarlar Konfederasiyasından (AMSK) məlumat verilib.
"Bu tədbirə cümə axşamı Bakıda keçiriləcək "Koreya tikinti avadanlıqlarının ixracı-2009" biznes-görüşündə iştirak edəcək sahibkarlar yollanacaqlar", - Konfederasiyadan deyiblər.
Mənbənin sözlərinə görə, Koreyanın Azərbaycandakı səfirliyi səfər və Azərbaycan sahibkarlarının imkanlarının Koreya sərgisində təqdimat xərclərini öz üzərinə götürüb.
Bakıdakı biznes-görüşü Koreyanın Orta və Kiçik Biznes Müdiriyyəti, Koreya Respublikasının Azərbaycandakı səfirliyi və Koreya Tikinti Avadanlıqları İstehsalçıları Assosiasiyası təşkil edir.
Görüşün keçirilməsində əsas məqsəd tikinti avadanlıqlarının ticarətinin və yeni biznes əlaqələrinin qurulması yolu ilə bazarın bu sahəsini genişləndirməkdir.
Biznes-görüş zamanı sözügedən sahədə əməkdaşlığın perspektivləri və idxal-ixrac münasibətlərinin təşkili haqqında müzakirələr aparılacaq.
Azərbaycanla Koreya arasında yanvar-may ayları ərzində xarici ticarət dövriyyəsi 130,94 milyon dollar təşkil edib. Məhsulların idxal payına 37,56 milyon dollar, ixrac payına isə 93,38 milyon dollar düşüb.
Məqalə müəllifi ilə əlaqə ünvanı: [email protected]