Аzərbaycan, Bakı, 24 may /Trend/
Azərbaycanın "Bank Standard"ı "Caspian Money Transfer" təcili pul köçürmələri sisteminə qoşulub, - bazar ertəsi yayılan məlumatda belə deyilir.
Yeni sistem MDB və Baltikyanı ölkələrdə, həmçinin, dünyanın Böyük Britaniya, İtaliya, Çexiya, Türkiyə, Yunanıstan və Çin kimi ölkələrində fəaliyyət göstərir. Köçürmələr Azərbaycan manatı, ABŞ dolları, avro və rus rublu vasitəsilə həyata keçirilir. "Caspian Money Transfer" sisteminin üstünlüklərinə köçürmə təhlükəsizliyi, həmçinin, komisyon haqların rəqabət qabiliyyəti səviyyəsini (köçürmə məbləğinin 1,5 faizi) nümunə göstərmək olar. "Caspian Money Transfer" sistemi bankın bütün xidmət məntəqələrində fəaliyyət göstərir.
Beləliklə, "Bank Standard"da mövcud təcili pul köçürmələri sisteminin ümumi sayı 10-a çatıb. Xatırladaq ki, bank "Caspian Money Transferlə" yanaşı, "Western Union", "Təcili poçt", "Contact", "Migom", "Xpress Money", "Lider", "Faster", "Qızıl tac" və "Privat Money" sistemləri üzrə də xidmətlər göstərir.
"Caspian Money Transfer" sistemi Azərbaycan "Zamin bank"ının xüsusi mülkiyyəti hesab olunur və 2008-ci ildən bəri fəaliyyət göstərir.
