Azərbaycan, Bakı, 18 avqust /Trend, müxbir N.İsmayılova/
Rusiya şirkətləri Azərbaycanda həyata keçirilən dövlət proqramlarında iştirak edə bilərdilər. Bu barədə Rusiyanın Azərbaycandakı ticarət nümayəndəsi Yuri Şedrin çərşənbə günü mətbuat konfransında bildirib.
"Rusiya sərmayələrinin qoyulması üçün milli iqtisadiyyatın elektroenergetika, nəqliyyat, yol tikintisi, inşaat materiallarının istehsalı və neft sənayesi avadanlıqları, gəmiqayırma, İT texnologiyaları və bank sektoru kimi sahələri perspektiv istiqamətlərdir", - Şedrin bildirib.
Onun sözlərinə görə, Rusiya şirkətləri "2010-2012-ci illərdə rabitə və informasiya texnologiyalarının inkişafı üzrə" (Elektron Azərbaycan)" və "2010-2014-cü illərdə dəmir yolu nəqliyyatının inkişafı üzrə" dövlət proqramlarının reallaşdırılmasında iştirak edə bilərdi. Rusiya biznesi kiçik SES-in inşasında, digər alternativ enerji mənbələrinin yaradılmasında kənd təsərrüfatı məhsullarının saxlanılması və emalı üzrə müəssisələr şəbəkəsinin inkişafında da iştirak edə bilər.
Azərbaycan neft maşınqayırması, yüngül sənaye, kənd təsərrüfatı və yol tikintisi texnikaları ilə xidmətlər üzrə lizinq şirkətlərinin, dərman preparatlarının istehsalı sahəsində birgə müəssisələrin yaradılmasında maraqlıdır.
Yanvar-iyun aylarında Rusiya Azərbaycan iqtisadiyyatına investisiya qoyan 15 ölkə arasında 9-cu yeri tutub. Rusiya Azərbaycanın, əsasən, qeyri-neft sektoruna 1,9 milyon manat (xüsusi çəkidə 0,3 faiz) investisiya qoyub.
