Azərbaycan, Bakı, 28 dekabr /Trend, müxbir Ü.İsmayılova/
Azərbaycanın lizinq sektoru ən sadə avadanlıqlardan başlamış ən mürəkkəb istehsal xətlərinədək hələ öz əksini tapmadığı sahələr də daxil olmaqla ikifayət qədər potensiala malikdir. Ən iri lizinq şirkətinin baş direktoru və Azərbaycanın Lizinq Şirkətləri Assosiasiyasının (ALŞA) rəhbəri Elçin Əhmədov belə hesab edir.
"Lizinq fəaliyyətini nizamlayan qanunvericilikdə zəif yerlər var. Ona görə də tərəfimizdən lizinq qanunvericiliyinin təkmilləşdirilməsilə bağlı məsələlər qaldırılıb. Təəssüf ki, bu məsələlər hələ öz həllini tapmayıb. Qanunvericiliyin təkmilləşdirilməməsi lizinq sektorunun inkişafına əngəldir", - Əhmədov bildirib.
Onun fikrincə, qanunvericilikdəki boşluqlara görə bu sahə hazırda yalnız bəzi seqmentlər üzrə çox məhdud inkişaf edir. Qanunvericiliyin natamamlığının məqamlarından biri isə "Lizinq haqqında" qanunun olmamasıdır. Azərbaycanın Mülki Məcəlləsindəki lizinq fəaliyyətinə dair bəndlərdə lizinqin mümkün olan, lakin Azərbaycanda istifadə olunmayan bir sıra tip və növləri öz əksini tapmayıb.
ALŞA aralarında Beynəlxalq Maliyyə Korporasiyası, USAID və digərlərinin də olduqları beynəlxalq təşkilat və maliyyə institutlarının iştirakı ilə "Lizinq haqqında" qanun hazırlayıb.
"Növbəti mərhələ qanun layihəsinin müvafiq strukturlara təqdim edilməsidir", - Əhmədov bildirib.
ALŞA rəhbəri onu da qeyd edib ki, bunlarla yanaşı, ƏDV (18 faiz) üzrə vergi mexanizminin qeyri-mükəmməl olduğunu nəzər çatdırmaq lazımdır. Məlum olduğu kimi, 2008-ci ilin yanvarınadək lizinq müqavilələri üzrə gətirilən mallara ƏDV qoyulmurdu, lakin sonralar bu güzəştlər ləğv edildi. Bununla yanaşı, lizinq sahəsində ƏDV-nin tutulması müxanizminin özü sistemləşdirilməyib və nəticədə bu gün lizinq xidmətlərinin göstərilməsi zamanı sövdələşmələrin bahalaşması baş verir.
"Ona görə də ƏDV-nin tutulması sisteminin bu sahədə hansısa işlək mexanizmin yaradılması üçün dəqiq sistemləşdirilməsini təklif edirik", - Əhmədov bildirib.
Onun sözlərinə görə, belə şəraitdə lizinq şirkətləri bank kreditləri və ya avadanlıqların nağd alınması ilə müqayisədə özlərinin aşkar üstünlüklərini itirilər. Hazırkı şəraitdə isə məhz lizinq əlavə girov təminatı tələbinin olmaması ilə əlaqədar şirkətlər üçün zəruri mexanizm ola bilər.
Assosiasiya 2004-cü il oktyabrın 27-də BMK-nın Azərbaycanda lizinqin inkişafına texniki köməyi çərçivəsində "Ataleasing", "Unileasing", "Muganleasing" şirkətləri tərəfindən yaradılıb.
