Azərbaycan, Bakı, 5 yanvar /Trend, müxbir N.İsmayılova/
"Bank Melli Iran"ın Bakı filialı öz tarif siyasətinin azaldılmasına baxmağı planlaşdırır. Bu barədə çərşənbə günü bankın direktor müavini Anar İbrahimov deyib.
"Bank rəhbərliyi kreditlər və depozitlər üzrə faiz dərəcələrinə, eləcə də bankın müştərilərinə hesablar xidmətinin azaldılmasına yenidən baxmaq barədə qərar qəbul edib", - İbrahimov qeyd edib.
Onun sözlərinə görə, bu günə yeni tariflərə bank rəhbərliyi baxır və onların cari ay ərzində təsdiqlənəcəyi gözlənilir.
Bank depozitləri üç valyutada - manat, dollar və avroda bir ildən üç il müddətə qədər qəbul edir. Filal direktoru müavininin sözlərinə görə, avroda olan illik depozitləri bank yeddi faizlə, manatla və dollarla olanları 11 faizlə cəlb edir. Bank iki il müddətinə manatla olan depozitləri illik 12 faizlə, üç il müddətinə isə 12,5 faizlə cəlb edir.
Hazırda bank kreditləri üç il müddətinə qədər 23 faiz dərəcəsi ilə verir. Bank avtomobil alışına ilkin ödəniş 30 faiz olmaqla illik 26 faiz dərəcəsi ilə kreditlər də verir. Kreditin maksimal məbləği 10 min dollar təşkil edir.
