Azərbaycan, Bakı, 29 iyul /Trend, müxbir N.İsmayılova/
"Fitch Ratings" Beynəlxalq Reytinq Agentliyi gözləyir ki, neftin yüksək qiymətlərinin saxlanılması Azərbaycanın qeyri-neft iqtisadiyyatının stabilləşməsinə və bərpasına kömək edəcək. Bu isə öz növbəsində aktivlərin keyfiyyəti, depozit bazası və bankların likvidliyi üçün sərfəli olmalıdır. Bu barədə "Fitch Ratings"in cümə günü açıqlanan "MDB/Gürcüstan bankları: yarımillik icmal və prqonoz" hesabatında deyilir.
"Fitch" gözləyir ki, ölkənin ÜDM-nin artımı 2010-cu ildəki 5 faiz və 2009-cu ildəki 9,3 faizlə müqayisədə 2011-ci ildə 3,2 faiz və 2012-ci ildə 4 faiz təşkil edəcək. Qeyri-neft sektorunun artımı yaxın gələcəkdə dövlət xərclərinin və əhəmiyyətli kapital qoyuluşlarının artırılması sayəsində saxlanılacaq.
Agentliyin fikrincə, ölkədə kreditləşmənin artması 2011-ci ilin ikinci yarısında və 2012-ci ildə sürətlənəcək.
Hesabatda deyildiyinə görə, 2010-cu ildə bankların çoxu gəlirli və onların xalis gəliri 2011-ci ilin birinci rübündə müsbət qalsa da, sektor gəlirin kəskin azalması və borcların dəyərinin artmasından əziyyət çəkir.
Ölkənin bank sektorunun aktivlərinin həcminin təxminən üçdə birinə sahib olan banklarda problemli kreditlərin payı 2010-cu ilin sonuna bu bankların kreditlərinin ümumi həcminin 14 faizinə çatıb. Agentlik hesab edir ki, banklar üçün aktivlərin keyfiyyətinə görə gələcək mənfi risklər hazırda məhdud olaraq əksər Azərbaycan bankları üzrə stabil proqnozu saxlayır.
"Fitch Ratings" bu gün dərc edilən hesabatında qeyd edir ki, əksər MDB ölkələrində və Gürcüstanda bankların kredit qabiliyyəti göstəriciləri 2011-ci ilin ilk yarısında stabilləşməkdə davam edib və agentlik gözləyir ki, bu proses 2011-2012-ci ilin ikinci yarısında davam edəcək. Resessiyadan sonra yüksək dünya qiymətləri və xammal malları ilə dəstəklənən regionun iqtisadiyyatı bərpa edilir və bu, aktivlərin keyfiyyətinə və bankların gəlirlərinə müsbət təsir göstərir. Eyni zamanda agentlik vurğulayır ki, hazırda bank sektorunda bərpa edilmə əsasən yavaş və qeyri-müəyyən olub və əhəmiyyətli zəif amillər qalır.
