Azərbaycan, Bakı, 2 avqust /Trend, müxbir N.İsmayılova/
Azərbaycanın maliyyə-bank sektorunun inkişaf istiqamətlərindən asılı olaraq "Kapital Bank" islam bankçılığının ənələrini bankı qane edən səmərəli qərarlar əsasında tətbiqi üzrə müəyyən addımlar ata bilər. Bu barədə çərşənbə axşamı Trend-ə bankın idarə heyətinin sədr müavini Yaşar Məmmədov deyib.
Onun sözlərinə görə, son onilliklər ərzində islam bankçılığı bir sıra inkişaf etmiş ölkələrin maliyyə dairələrində geniş yayılıb. Azərbaycan bankçılığın bu növünün qlobal maliyyə sistemi ilə harmoniyalaşdırılmasının optimal perspektivliyinə aid olan bu prosesləri nəzərə alır. Ölkədə də islam bankçılığının tətbiqinə başlayan bir sıra banklar var.
"Kapital Bank"ın islam bankçılığının tətbiqinə aid planlarına gəlincə, fikrimizcə, hazırda Azərbaycanda bank işində tətbiq edilən ənənvi yanaşma ölkənin sosial-iqtisadi həyatının tələbləri üçün optimaldır", - Məmmədov bildirib.
Onun sözlərinə görə, beləliklə, "Kapital Bank" Azərbaycanda islam bankçılığının formalaşdırılması proseslərini diqqətlə izləyir. Bu proseslər "Kapital Bank"da islam bankçılığının tətbiqi perspektivləri öyrənilməklə təhlil edilir.
"Bu istiqamətdə işlər çərçivəsində bu yaxınlarda bankda Özəl Sektorun İnkişafı üzrə İslam Korporasiyasının nümayəndələri ilə görüş keçirilib. Görüşdə əməkdaşlıq perspektivləri müzakirə edilib və bir sıra təkliflər irəli sürülüb", - Məmmədov qeyd edib.
Hazırda Azərbaycanın bank sektorunda "Nikoil Bank" belə xidmət təklif edən ilk Azərbaycan bankıdır. Əvvəllər islam bankçılığı üzrə xidmətlərin göstərilməsi ilə bağlı Azərbaycan Beynəlxalq Bankı, "Amrahbank", "Turanbank", "Texnikabank" öz istəklərini bildirmişdilər. Azərbaycan Beynəlxalq Bankında (ABB) islam bankçılığının xidmətlərinin və məhsullarının təqdim edilməsi üzrə ixtisaslaşmış stukturun yaradılması üçün məsləhətçi kimi "Salans", "Pinsent Masons" və KPMG şirkətlərinin konsorsiumunu seçib. ABB müvafiq qanunun hazırlanması təşəbbüsü ilə də çıxış edib.
2008-ci ilin yayınadək "Kapital Bank" tamamilə dövlət mülkiyyətində olub. Hazırda "Kapital Bank"ın səhmdarı "Paşa Holdinq"dir. Ona səhmlərin 97,75 faizi məxsusdur.
Keçmişdə "Kapital Bank" Birləşmiş Universal Səhmdar Bankı (BUS Bank) adlanıb. Öz növbəsində Birləşmiş Universal Səhmdar Bankı Nazirlər Kabinetinin 21 fevral 2000-ci il tarixli 40 "s" nömrəli sərəncamı ilə açıq tipli səhmdar cəmiyyəti formasında yaradılıb. BUSBank üç dövlət səhmdar-kommersiya bankının - Aqrar-Sənaye, Sənaye-İnvestisiya və Əmanət banklarının sağlam aktiv və öhdəliklərinin birləşdirilməsi nəticəsində yaradılıb.
"Kapital Bank"ın aktivləri 2011-ci ilin birinci yarısında 11,8 faiz artaraq iyulun 1-nə 874,4 milyon manat təşkil edib. Bankın məcmu kapitalı 71,88 milyon manat, nizamnamə kapitalı isə 30 milyon manat təşkil edib.
Avqustun 2-nə olan rəsmi məzənnə 0,7865 AZN/USD təşkil edir.