Azərbaycan, Bakı, 15 sentyabr /Trend, müxbir A.Axundov/
İyul ayı ilə müqayisədə avqust ayı ərzində Azərbaycanda kənd təsərrüfatı məhsullarının istehsalı 0,3 faiz, yanvar-avqust ayında isə ötən ilin analoji dövrü ilə müqayisədə 11,8 faiz bahalaşıb. Bu barədə Trend-ə Azərbaycan Dövlət Statistika Komitəsindən məlumat verilib.
Avqustda heyvandarlıq məhsullarının qiyməti ümumilikdə ötən ayla müqayisədə 0,2 faiz, yanvar-avqustda isə ilk yeddi ay ərzində 11,8 faiz artıb.
Ay ərzində iribuynuzlu mal-qara, qoyun və keçilər diri çəkidə 0,1 faiz azalıb, onların südü (emal edilməmiş) və yununun qiymətləri isə 0,7 faiz bahalaşıb. Toyuq və yumurta 0,4 faiz bahalaşıb.
Kənd təsərrüfatı məhsullarının taxıl və paxla bitkilərinin istehsal qiymətləri ay ərzində 0,3 faiz artıb. Bundan başqa, tərəvəz və bostan məhsullarının qiyməti 0,3 faiz, illik bitkilər isə 0,1 faiz bahalaşıb.
Avqustda meşə təsərrüfatı mallarının qiymətləri ay ərzində dəyişməz qalıb, il ərzində 5,8 faiz azalıb. Balıq və balıq məhsullarının qiyməti ay ərzində 14,5 faiz, il ərzində 6,6 faiz azalıb.
2011-ci ilin səkkiz ayı ərzində Azərbaycanda kənd təsərrüfatı məhsullarının istehsalı ötən ilin analoji dövrü ilə müqayisədə 9,4 faiz, o cümlədən bitkiçilik məhsulları 13,7 faiz, heyvandarlıq məhsulları 4,2 faiz artıb.
Yanvar-avqustlda faktiki qiymətlər üzrə kənd təsərrüfatı məhsullarının ümumi dəyəri 3,263 milyard manat təşkil edib.
Səkkiz ay ərzində ölkənin meşə təsərrüfatlarında istehsal edilən məhsul və xidmətlərin faktiki qiymətlər üzrə ümumi dəyəri 456 min manat təşkil edib, eləcə də 64,3 min manatlıq balıq tutulub.
Sentyabrın 15-nə olan rəsmi məzənnə 0,7867 AZN/USD təşkil edir.
