Azərbaycan, Bakı, 29 noyabr /Trend, müxbir A.Axundov/
MDB-nin Gömrük İttifaqına (Gİ) daxil olmayan ölkələrinin həmin qurumun tədqiqat laboratoriyalarının və sertifikatlaşdırılmış orqanlarının reyestrinə daxil olması mümkündür, lakin sadə məsələ deyil. Bu barədə çərşənbə axşamı Trend-ə RF Texniki tənzimləmə və metrologiya üzrə Federal Agentlik rəhbərinin müavini Aleksandr Zajiqalkin bildirib.
Zajiqalkin Bakıda keçirilən MDB iştirakçısı olan ölkələrin standartlaşdırma, metrologiya və sertifikatlaşdırma üzrə milli orqanları rəhbərlərinin iclasında iştirak edir.
"İndi vahid formada Gömrük İttifaqının sertifikatlarının sertifikatlaşdırılmış orqanlarının reyestrinə yalnız Gİ-yə üzv olan ölkələrin orqanları daxil edilə bilər. Gömrük İttifaqına daxil olmayan Azərbaycan tərəfinin və ya MDB-nin digər ölkəsinin sertifikatlaşdırılmış orqanın reyestrinə daxil olması mümkündür, lakin sadə məsələ deyil. İclas zamanı aparılan müzakirələr göstərdi ki, bu istiqamətdə hərəkət etmək lazımdır. Burada bir çox variantlar var. Məsələn, Gİ-nin texniki reqlamentinə qoşulmaq. Prinsip etibarilə, belə məsələyə baxmaq olar, amma mürəkkəb məsələdir və işlənib tamamlanma tələb etməsi başqa məsələdir. Məsələn, siz Çin şirkəti olmasanız, Çində sertifikatlaşma orqanı kimi akkreditə oluna bilməyəcəksiniz", - Zajiqalkin deyib.
Onun sözlərinə görə, Rusiya artıq Gİ-nin 2 minə yaxın sertifikatını verib.
"Bu, vahid formada verilən və ötən ilin iyulundan işləyən Gİ sertifikatıdır. Vahid formada verilən bu sertifikatların sayı artır. Rusiya artıq 2 minə yaxın belə sertifikat verib və hesab edirəm ki, Belarus və Qazaxıstan da az verməyib. Bu o deməkdir ki, azərbaycanlı sahibkar, məsələn, Belarusda sertifikat alaraq bu məhsulu bir sənəd əsasında Qazaxıstana da, Rusiyaya da ixrac edə bilər. Əlbəttə, bu, kifayət qədər ciddi maneənin aradan götürülməsidir", - Zajiqalkin qeyd edib.
Azərbaycanın Standartlaşdırma, Metrologiya və Patent üzrə Dövlət Komitəsinin rəhbəri Ramiz Həsənovun sözlərinə görə, belə sertifikatların verilməsi Azərbaycan məhsullarının Gİ ölkələrinə ixracının sadələşdirilməsi üçün ciddi alətdir.
"Belə alətin olmadığı şəraitdə hər ölkədən ayrı-ayrılıqda sertifikat almaq lazım gəlir", - Həsənov deyib.
