Azərbaycan, Bakı, 7 dekabr /Trend, müxbir A.Axundov/
Azərbaycan və ABŞ arasında ticari münasibətlərin potensialı mövcud 1,8 milyon dollarlıq göstəricidən bir neçə dəfə çoxdur. Bu barədə çərşənbə günü Trend-ə ABŞ-ın Azərbaycandakı səfiri Metyu Brayza deyib.
"İndiki mal dövriyyəsi çox kiçikdir, bir neçə dəfə çox ola bilər. Biz Azərbaycandan enerji idxal etmirik. Bizim bazarımız çox uzaqdadır ki, bu da göstəricilərə güclü təsir edir. Mövcud ticari münasibətlərin genişləndirilməsi üçün çox şeylər etməliyik", - Brayza bildirib.
O deyib ki, buna görə də iki ölkənin Azərbaycanın Ümumdünya Ticarət Təşkilatına qəbul edilməsində birgə işləməsi və bu prosesi sürətləndirməsi vacibdir.
"Əgər Azərbaycan öz iqtisadiyyatını informasiya texnologiyaları, turizm, nəqliyyat sektoru, kənd təsərrüfatı istiqamətində şaxələndirməyə davam edərsə, bu, mal dövriyyəsinin təbii artımına təsir edəcək. Potensial daha böyükdür və burada əsas amil odur ki, biz dost və müttəfiqik", - Brayza deyib.
Onun sözlərinə görə, ABŞ hələ indi Azərbaycana investisiya qoymağa başlayıb. Belə ki, iki ölkənin bazarı bir-birindən çox uzaqdadır.
"Əsas amerikalı investorlar hələ regionu yaxşı tanımır, lakin artıq qeyri-enerji sektoru, kənd təsərrüfatı, sənaye, enerji sektoru və s. ilə əlaqədar iri şirkətlər tərəfindən maraq artır", - Brayza bildirib.
ABŞ-ın Azərbaycana ixracatının artmasına gəlincə, o deyib ki, burada "Azərbaycan Hava Yolları" QSC tərəfindən ABŞ-ın "Boeing" şirkətinin yeni təyyarələrinin əldə olunması böyük rol oynayacaq.
"Bu ixracatda vacib müddəanı Azərbaycan tərəfindən bir neçə "Boeing" və peykin əldə edilməsi təşkil edib. Peyki gələn il buraxmaq planlaşdırılır. Azərbaycan "Microsoft" şirkəti ilə də sıx əməkdaşlıq edir", - Brayza deyib.
Onun sözlərinə görə, Azərbaycanda ABŞ investiyaları üçün informasiya texnologiyaları, nəqliyyat, turizm və kənd təsərrüfatı daha perspektivlidir.