Azərbaycan, Bakı, 26 aprel / Trend, müxbir İ.Xəlilova /
2013-cü ildən Azərbaycanda özəl notariusların gəlirlərinə 10 faizlik vergi qoyula bilər. Bu barədə cümə axşamı Trend-ə ölkə hökumətindəki mənbə məlumat verib.
"Ölkədə özəl notariuslara vergi qoyulmasının mexanizmlərinin təkmilləşdirilməsi çərçivəsində artıq notariusların rüb ərzində əldə etdikləri gəlirlərin (xərclər hesaba alınmadan) ümumi həcmindən 10 faiz vergi tutulmasına dair razılaşma əldə olunub", - mənbə bildirib.
Notariusların gəlirlərinə onların göstərdikləri xidmətlərə görə haqlar, dövlət rüsumları və başqa ödəmələr aiddir.
"Həmin dəyişikliklərin mayın 15-dək ölkə parlamentinə təqdim olunacaq Vergi Məcəlləsinə düzəlişlərlə bağlı ümumi qanun layihəsinə daxil edilməsi planlaşdırılır. Habelə vergi qanunvericiliyinə özəl notariuslarla bağlı dəyişikliklərin edilməsini nəzərdə tutan ayrıca qanununun qəbul edilməsi variantı da mövcuddur", - mənbə bildirib.
Qüvvədə olan qanunvericilikdə özəl notariuslardan vergi tutulmasına dair ayrıca maddə nəzərdə tutulmayıb. Hazırda vergi tutularkən Azərbaycanda fəaliyyət göstərən özəl notariuslara müxtəlif yanaşmalar tətbiq edilir: onlardan bəziləri sadələşdirilmiş mənfəətdən vergi, bəziləri isə gəlir vergisi (xərclər hesaba alınmadan) ödəyirlər. Halbuki Vergi Məcəlləsində sadələşdirilmiş vergi ödəyiciləri hüququna sahibkarlıq fəaliyyəti ilə məşğul olan şəxslər malikdirlər.
Notariusların fəaliyyəti sahibkarlıq fəaliyyətinə aid deyil. Ona görə də Ədliyyə Nazirliyi tərəfindən onların gəlirlərindən 10 faizlik (xərclər hesaba alınmadan) vergi tutulması təklif olunub ki, bu da Maliyyə və Vergilər nazirlikləri tərəfindən dəstəklənir.
