Azərbaycan, Bakı, 5 oktyabr/Trend, müxbir A. Axundov/
Avropa Yenidənquram və İnkişaf Bankı (AYİB) 2013-cü ildə Azərbaycanın bank sektorunda gözlənilən birləşmə və "ələ keçirmə" proseslərində fəal iştirak etməyi planlaşdırır. Trend-in məlumatına görə, bu barədə cümə günü jurnalistlərə AYİB-in Azərbaycandakı nümayəndəliyinin rəhbəri Nil Makkeyn bildirib.
"Bankların məcmu kapitalının minimum həcminə qarşı tələblərin artırılması səbəbindən gələn il maliyyə sektorunda gələn il çox böyük dəyişikliklər olacaq. Bu, olduqca düzgün qərardır, biz fəal dəstəkləyirik və Azərbaycan bankları birləşmək qərarına gəlsələr, yaxud bankların əldə edilməsi məsələsində onları dəstəkləməyə çalışarıq", - Makkeyn deyib.
Onun sözlərinə görə, AYİB maliyyə, habelə mənəvi və texniki dəstək göstərilməsi baxımından bu layihələrdə iştirak etməyə hazırdır.
"Axı söhbət burada təkcə maliyyə kapitalından deyil, həm də iş kapitalından - Azərbaycan bankirlərinin bilikləri və təcrübəsindən gedir", - Makkeyn qeyd edib.
Onun sözlərinə görə, bu məqsədlə gələn həftə Bakıya Qafqaz, Monqolustan və Mərkəzi Asiya ölkələri üzrə maliyyə institutları ilə iş üzrə direktor Mayk Teylor gələcək.
"O, təkcə yerli banklarla deyil, həm də Azərbaycanın maliyyə sektoru ilə maraqlanan digər banklarla da görüşlər keçirmək məqsədi ilə gəlir", - Makkeyn vurğulayıb.
Oktyabrın 9-dan həftənin sonunadək davam edəcək səfər çərçivəsində Teylor habelə Azərbaycan Mərkəzi Bankında və bu prosesdə iştirak etmək istəyən mikromaliyyə təşkilatları ilə görüşlər keçirəcək.
"Bu, maliyyə sektoru üçün çox maraqlı dövrdür, biz bunu uzun müddətdir gözləmişik. Biz hökumətin nəhayət belə qərar aldığına görə çox şadıq", - Makkeyn qeyd edib.