Azərbaycan, Bakı, 22 noyabr /Trend, müxbir A.Axundov/
Avropa İttifaqı (Aİ) qiymətli kağızlar sahəsində tənzimləmə və nəzarət bacarıqlarının artırılmasında Azərbaycana kömək edəcək. Trend-in məlumatına görə, bu barədə cümə axşamı Polşanın Maliyyə Nəzarəti Agentliyinin (PMNA) nümayəndəsi xanım İlona Pyeçinska-Çernı "Azərbaycan Respublikasının qiymətli kağızlar bazarı üzrə qanunvericiliyinin Avropa İttifaqının qanunvericiliyinə uyğunlaşdırılması və Qiymətli Kağızlar üzrə Dövlət Komitəsinin institusional inkişafı" tvinninq layihəsinin təqdimatında deyib.
"Layihənin məramı qiymətli kağızlar bazarının və maliyyə xidmətləri göstərən təşkilatların tənzimlənməsini Avropa İttifaqının qanunvericiliyinə uyğunlaşdırmaq məqsədilə bu sahədə Azərbaycanın qanunvericilik bazasını təkmilləşdirmək və Qiymətli Kağızlar üzrə Dövlət Komitəsinin (QKDK) tənzimləyici və institusional potensialını artırmaqdan ibarətdir", - Pyeçinska-Çernı qeyd edib.
Aİ-nin tvinninq layihəsinin büdcəsi 999 950 avrodur. Layihənin həyata keçirilməsinə 2012-ci ilin oktyabrın 1-dən başlanıb və 2014-cü il mayın 31-dək davam edəcək. Benefisiar tərəfdən partnyor qismində QKDK, Aİ-yə üzv ölkədən isə Polşanın Maliyyə Nazirliyi Agentliyi çıxış edir.
"PMNA və QKDK ekspertləri layihənin icrasında yaxından əməkdaşlıq edəcəklər. Layihə ayrı-ayrı mövzular üzrə qısamüddətli ekspert missiyaları şəklində həyata keçiriləcək", - o qeyd edib.
Onun sözlərinə görə, layihə aşağıdakı üç komponentdən ibarət olacaq: qanunvericiliyin hazırlanmasına dəstək və konsaltinq; tənzimləmə və nəzarət bacarıqlarının artırılması; qiymətli kağızlar bazarı iştirakçılarının məlumatlılıq səviyyəsinin artırılması.
Milli qanunvericiliyin Aİ qanunvericiliyi ilə uyğunlaşdırılacağı əsas sahələr aşağıdakılardır: fond birjasında qeydiyyatdan keçmiş şirkətlər üçün şəffaflıq və məlumatın açıqlanması tələbləri; səhm və borc alətləri olan qiymətli kağız emitentlərinin prospektləri; kapital bazarı vasitəçiləri üçün kapital adekvatlığı tələbləri; sekyuritizasiya (təminatlandırma); şirkətlərin birləşdirilməsi və satın alınması; şirkətlərdə nəzarət payının əldə edilməsi; səhmdar cəmiyyətlərin yenidən təşkil olunması və kapital göstəricilərinin gözlənilməsi; səhmdar hüquqlarının müdafiəsi; səhmlərin fond bazarlarında satılması; habelə, müvafiq tənzimləyici qurumlar arasında səlahiyyətlərin bölgüsü.
