Azərbaycan, Bakı, 21 sentyabr /Trend, müxbir T.Cəfərov/
İraq Xəzər dənizində yerləşən İranın Ənzəli limanı vasitəsilə Rusiyaya mazut ixrac edir. Bunu şənbə günü İranın Gilan əyalətinin Gəmiçilik İdarəsinin sədri Fərhad Müntəsər Kuhsari bildirib. Trend-in məlumatına görə, bu barədə İSNA agentliyi məlumat verir.
Kuhsari deyib ki, mazut xüsusi mazutdaşıyan yük maşınları vasitəsi ilə İraqın Başmaq sərhədindən İranın Ənzəli limanına daşınır, orada gəmilərə yüklənərək Rusiyanın Mahaçqala limanına göndərilir.
Onun sözlərinə görə, Ənzəli limanı vasitəsilə 100 ton mazutun Rusiyaya nəqli nəzərdə tutulub: "Hazırda 2000 ton mazut gəmiyə yüklənir və sabah Mahaçqala limanına doğru hərəkət edəcək".
Kuhsari əlavə edib ki, Ənzəli limanında neft və neft məhsullarının "svap" edilməsi və tranziti üçün əlverişli şərait mövcuddur:
"Gələcəkdə neft və neft məhsullarının Ənzəli limanından Tehrana nəqli üçün boru kəmərinin tikilməsi və həmçinin neft və neft məhsullarının saxlanılması üçün anbarların tikilməsi nəzərdə tutulur".
