Azərbaycan, Bakı, 13 noyabr /Trend, müxbir H.Vəliyev /
2013-cü ildə Azərbaycanla İtaliya arasında əmtəə dövriyyəsi ötənilki göstəricilərlə müqayisədə iki dəfə artıb. Bu barədə çərşənbə günü jurnalistlərə İtaliyanın iqtisadi inkişaf nazirinin müavini Karlo Kalenda deyib. O, Azərbaycan-İtaliya biznes forumunda iştirak edən nümayəndə heyətinə rəhbərlik edir.
Onun sözlərinə görə, Azərbaycanda İtaliya sərmayələrinin əsas həcmi enerji sahəsinə qoyulub ki, bu da bir növ balans pozğunluğu yaradır. Belə ki, Azərbaycandan İtaliyaya əsasən başqa məhsullar idxal olunur: "Biz İtaliya şirkətlərini toxuculuq sənayesində, inşaat və digər sahələrdə iştirak üçün həvəsləndirmək niyyətindəyik".
Biznes forumunda İtaliyanı ölkənin inşaat, neft-qaz və digər sektorlarını təmsil edən 130 şirkət təmsil edir.
İtaliyanın iqtisadi inkişaf naziri deyib: "Avqustda İtaliyanın Baş naziri Enriko Letta Azərbaycana səfər edib. Səfər çərçivəsində əsasən Azərbaycan qazının Avropa bazarlarına ixracı marşrutu qismində seçilən Trans Adriatik qaz kəməri (TAP) layihəsi müzakirə olunub. Demək olar ki, bugünkü forum Lettanın Azərbaycana səfərinin davamıdır. Biz ümid edirik ki, Azərbaycanla İtaliya arasında ikitərəfli əlaqələr gələcəkdə yalnız artan xətlə irəliləyəcək".
Kalendanın sözlərinə görə, ölkələr arasında münasibətlər çox yüksək səviyyədədir: "Lakin hələlik yalnız investisiya sahəsində əməkdaşlıq aşağı səviyyədədir, zəif sürətlə inkişaf edir. Əsas məqsədimiz İtaliya və Azərbaycan şirkətlərinin qarşılıqlı tanışlığından ibarətdir ki, bu da hər iki ölkənin iqtisadiyyatına yatırımları artırmağa imkan verir".
Onun sözlərinə görə, biznes forumu çərçivəsində 300-ə yaxın görüşün keçiriləcəyi gözlənilir və noyabrın 13-də axşam əməkdaşlıq üçün əsas istiqamətlərin artıq konkretləşdiriləcəyini gözləmək olar.
