Azərbaycan, Bakı, 11 noyabr /Trend, müxbir İlahə Məmmədli/
Ümumdünya Ticarət Təşkilatının (ÜTT) Katibliyi Azərbaycanın bu təşkilata daxil olması üzrə çoxtərəfli və ikitərəfli danışıqların vaxtını 2015-ci ilin I rübünə keçirib. Bunu Trend-ə danışıqlar qrupunun rəhbəri, xarici işlər nazirinin müavini Mahmud Məmməd-Quliyev deyib.
ÜTT-nin işçi qrupu ilə görüş təxminən cari il noyabrın sonu - dekabrın əvvəlində keçirilməli idi.
M.Məmməd-Quliyev qeyd edib ki, danışıqların növbəti raundunun təxirə salınması ilin sonunda ÜTT Katibliyində gərgin qrafiklə bağlıdır: "Bu, Qazaxıstanın təşkilata gözlənilən qoşulması (bu ilin sonunadək planlaşdırılıb) ilə izah edilə bilər".
Onun sözlərinə görə, ilkin məlumata əsasən, işçi qrupu ilə görüş, ÜTT-nin üzv ölkələri ilə ikitərəfli danışıqlar və kənd təsərrüfatına daxili dəstək məsələləri üzrə çoxtərəfli danışıqlar gələn ilin fevralında keçiriləcək.
Qeyd edək ki, işçi qrupu ilə son görüş bu ilin iyun ayında Cenevrədə keçirilib.