Dövlət Sosial Müdafiə Fondu (DSMF) ilin sonuna kimi hüquqi şəxslərin icbari sosial sığortalarının həcmini 35 mlrd manata qədər artırmağı planlaşdırır. Trend in məlumatına görə, bu barədə DSMF-in rəhbəri Səlim Müsülümov avqustun 26-da mətbuat konfransında bildirib.
Onun sözlərinə görə, icbari sosial sığortanın həcminin artırılması üzrə bir sıra tədbirlər görülür. Bakıda hüquqi şəxslərlə iş üzrə departament yaradılıb və sosial ödənişlərin fonda ödənilməsi üzrə bütün funksiyalar və paytaxtın 11 inzibati rayonuna nəzarət bu departamentə tapşırılıb.
İyulun 4-dən fəaliyyət göstərən departamentin ştatına 110 nəfər daxildir. "Təkcə iyul ayında hüquqi şəxslərdən toplanmış vəsaitlərin həcmi keçən aylarla müqayisədə 7 mlrd çox olub", - deyə S.Müslümov qeyd edib.
O, həmçinin bildirib ki, fondun məqsədi Bakı şəhərinin hüquqi şəxslərindən yığımın məbləğini 21 mlrd manatdan 35 mlrd manata qədər artırmaqdır.