Dövlət Baytarlıq Xidməti hökumətə "Baytarlıq haqqında" qanunun tətbiqinə dair təkliflər hazırlayır. DBX-dən Trend ə verilən məlumata görə, bu tədbirlər ölkə prezidentinin "Baytarlıq haqqında" qanunun tətbiqinə dair 2005-ci il noyabr tarixli fərmanına uyğun olaraq keçirilir. Xidmətdən o da bildirilib ki, hazırlanmış ilkin təkliflər son variantın müəyyənləşdirilməsi və işlənib hazırlanması üçün dekabrın 9-da Nazirlər Kabinetində müzakirə ediləcək. Baytarlıq Xidmətinin məlumatına görə, təxminən 70 təklif hazırlanmalıdır.
Prezidentin fərmanı ilə Nazirlər Kabinetinə bir ay ərzində mövcud qanunvericilik aktlarının "Baytarlıq haqqında" qanunla uzlaşdırılmasına dair təkliflər hazırlayaraq prezidentə təqdim etmək, Nazirlər Kabineti və müvafiq mərkəzi icra hakimiyyəti orqanlarının normativ-hüquqi aktlarının bu qanunla uzlaşdırılmasını təmin etmək və bu barədə prezidentə məlumat vermək, "Baytarlıq haqqında" qanunun pozulmasına görə məsuliyyət növlərini müəyyən edən qanunvericilk aktı layihəsini hazırlayaraq prezidentə təqdim etmək, diaqnostikası və ləğvi dövlət büdcəsinin vəsaiti hesabına həyata keçirilən xüsusilə təhlükəli heyvan xəstəliklərinin siyahısını təsdiq etmək və s. tapşırılır.
