Azərbaycan Vergilər Nazirliyi vergi cinayətinə görə nəzərdə tutulmuş cəzaları sərtləşdirməyi təklif edir. Trend in xəbər verdiyi kimi, bu barədə vergi cinayətlərinin ilkin araşdırılması departamentinin rəhbəri Nurəli Məmmədov bildirib.
Onun sözlərinə görə, 213-cü maddəyə dəyişiklik etmək nəzərdə tutulur. Bu maddənin birinci hissəsində nəzərdə tutulmuş müddətin 2 ilədək artırılması təklif olunur. Maddənin 2-ci hissəsində cəza müddəti 3 ildən 7 ilədək artırılacaq. Bundan başqa, 192-ci maddədə cəza müddətinin 7 ilədək artırılması nəzərdə tutulur. Bütün bu təkliflər baxılmaq və təsdiqlənmək üçün Respublika Baş Prokurorluğu vasitəsilə ölkə parlamentinə təqdim olunub.
N.Məmmədov qeyd edib ki, bu ilin 3 ayı ərzində vergi cinayətləri üzrə 245 iş araşdırılıb. Bunun 92-si bu il açılıb. 2006-cı ilin aprelində təxminən 33 iş açılıb.