Trend in xəbər verdiyi kimi, Azərbaycan Korporativ İdarəçiliyi layihəsi (AKIL) çərçivəsində sentyabrın 25-də Bakıda İqtisadi Əməkdaşlıq və İnkişaf Təşkilatının (OECD) korporativ idarəçiliyi prinsiplərinin Azərbaycan dilinə rəsmi tərcüməsinin təqdimat mərasimi keçirilib.
Adıçəkilən prinsiplər təmannasız olaraq səhmdar cəmiyyətlərinə, AKIL çərçivəsində fəaliyyət göstərən auditorlara, dövlət strukturlarına, tədris müəssisələrinə paylanılıb. AKIL layihəsinin rəhbəri Çarlz Kepfildin bidirdiyinə görə, Azərbaycan şirkətləri və bankları korporativ idarəçilik prinsiplərindən istifadə etməklə milli qanunvericiliyə riayət etməlidirlər. Onlar müasir iqtisadiyyatda investisiyaların cəlbi üçün korporativ idarəçiliyin bir alət kimi vacibliyini başa düşməlidirlər.
Son vaxtlar Azərbaycanda korporativ idarəçiliyə diqqət artır. OECD prinsipləri isə gələcək qanunvericilik üçün əsas olacaq və korporativ idarəçilik təcrübəsini təkmilləşdirmək və fəaliyyət nəticələrini yaxşılaşdırmaq istəyən Azərbaycan şirkətləri üçün təlimat ola bilər. Aparıcı korporativ idarəçilik təcrübəsi üçün beynəlxalq əsas olan OECD standartlarının vacibliyi barədə informasiyanın olmaması bu təcrübənin Azərbaycanda inkişafına maneçilik törədir. Başlıca maneə isə dildir, belə ki, bank və şirkət qulluqçularının böyük əksəriyyəti lazımi səviyyədə ingilis dilini bilmirlər. Ona görə də OECD prinsiplərinin Azərbaycan variantı ona böyük ehtiyacı olanlara yararlı olacaq.