Azərbaycanın dövlət büdcəsi layihəsinə əsasən respublika prezidenti tərəfindən yaradılmış "Avtomobil yolları" məqsədli büdcə fonduna 98 mln. AZN daxil olacaq.
Trend xəbər verir ki, büdcə fonduna daxilolmalar 18 mln. 200 min AZN yol vergisi hesabına, 6 mln. 300 min AZN yük və sərnişin daşınması üçün istifadə olunan avtonəqliyyat vasitələrinin sürücü və istifadəçiləri tərəfindən ödənilən sadələşdirilmiş vergi hesabına, 35 mln. AZN idxal olunan avtomobillər üçün tətbiq olunan aksizlər, 30 mln. AZN idxal olunan avtomobillər üçün tətbiq olunan vergi rüsumları, 3 mln. 500 min AZN Azərbaycan ərazisindən keçməklə beynəlxalq daşınmaların həyata keçirilməsi üçün icazələrdən dövlət rüsumları, 5 mln. AZN avtonəqliyyatların, o cümlədən motonəqliyyat vasitələri, qoşqu və yarımqoşquların illik texniki müayinəsindən dövlət rüsumları hesabına müəyyənləşdirilib.
"Avtomobil yolları" büdcə fondu avtomobil yollarının tikintisi və yenidənqurulması, avtomobil yolları şəbəkəsindən səmərəli istifadə və onların lazımi vəziyyətdə saxlanması sahəsində həyata keçirilən işlərin sürətləndirilməsi üçün yaradılıb. Azərbaycanın Nəqliyyat Nazirliyi vəsaitlərin sərəncamçısı təyin olunub.