Azərbaycan hökümətinin 2007-ci il üçün iqtisadi siyasətində prioritet istiqamətlər makroiqtisadi sabitliyin qorunması, inflyasiyanın və manatın dollara nisbətən məzənnəsinin həddindən artıq artmasının qarşısının alınması, iqtisadiyyatın müstəqilliyinin, diversifikasiyasının təmin olunmasıdır. Trend xəbər verir ki, bu barədə iqtisadi inkişaf nazirinin müavini Sevinc Əsədova 2007-ci ilin makroiqtisadi göstərici proqnozlarının müzakirəsi üzrə parlament komissiyalarının bugünkü birgə toplantısında məlumat verib.
Ümumilikdə 2007-ci il üçün ÜDM həcmi 26,3% real artım tempi ilə 22 mlr. manat həcmində planlaşdırılıb.
"Müqayisə üçün qeyd etmək istərdim ki, neft ehtiyatları ilə zəngin olan Rusiya və Qazaxıstanda bu göstərici müvafiq olaraq 6% və 8,2% təşkil edəcək. Adambaşına düşən ÜDM-nin xüsusi çəkisi 27% artacaq və 3 min ABŞ dolları, 2007-2010-cu illərdə isə 5 min ABŞ dolları təşkil edəcək", - deyə S.Əsədova qeyd edib.
Onun sözlərinə görə, neft sektorunda inkişaf davam etdiriləcək və 2010-cu ilə qədər 67,3 mln. ton həcmində neft hasilatı proqnozlaşdırılır.
Xarici ticarət dövriyyəsi gələn ildə 19,7 mlrd. ABŞ dolları həcmində, ödəniş balansı üzrə cari əməliyyatlar - 5,4 mlrd. ABŞ dolları, 2010-cu ildə - 16,9 mlrd. ABŞ dolları məbləğində proqnozlaşdırılır.
