Azərbaycan, Bakı, 05 iyun / Trend , İ.Xəlilova/ Türkiyənin milli neft qaz şirkəti "TRAO" Xəzər regionunda, MDB və Afrikada əməliyyatları genişləndirməyi planlaşdırır. Bu haqda şirkətin vitse-prezidenti Yurdal Öztaş Bakıda "Neft və Qaz, Neft emalı və Neft kimyası" 15-ci beynəlxalq yubiley konfransında çıxışı zamanı bildirib.
Sərgi və konfrans "Iteca Caspian" şirkəti tərəfindən təşkil edilib.
"Dünya bazarlarında qiymətlərin artması kəşfiyyat işlərinin çoxalmasını stimullaşdırır, lakin onların Xəzər regionunda genişləndirilməsi bu regionun ölkələri arasında beynəlxalq əlaqələrin aydınlaşdırılmasından sonra mümkün olacaq [Azərbaycan, İran və Türkmənistan arasında Xəzərin status məsələsinin həlli - Trend -ın qeydi]", - deyə Öztaş bildirib.
"TRAO"nun vitse-prezidenti hesab edir ki, şirkət üçün Azərbaycan, Qazaxıstan və Şimali Afrikadakı layihələr daha perspektivlidir.
Türkiyə şirkəti Azərbaycanda üç dəniz neft qaz layihələrinin iştirakçısıdır: "Azəri-Çiraq-Günəşli" - 6,75 faiz, "Şahdəniz" - 9 faiz və "Araz-Alov-Şərq" - 10 faiz.
Müəlliflə əlaqə saxlamaq üçün elektron ünvan: [email protected]