Azərbaycan, Bakı, 03 oktyabr / Trend / SOCAR-ın (Azərbaycan Dövlət Neft Şirkəti) Geofizika və Geologiya İdarəsi Bəyimdağ-Təkçay və Muradxanlı-Cəfərli-Ağaməmmədli-Qaralı sahələrində seysmokəşfiyyat işlərini başa çatdırıb. Bu barədə idarənin məlumatında bildirilir.
Bəyimdağ-Təkçay sahəsində iki (2D), Muradxanlı-Cəfərli-Ağaməmmədli-Qaralı sahələrində isə üç ölçülü (3D) seysmik işlər aparılıb. Seysmokəşfiyyat SOCAR-ın tərkibinə daxil olan "Azneft" İstehsalat Birliyinin sifarişi ilə həyata keçirilib.
Seysmokəşfiyyatın aparılması üzrə hesabat Texniki Şurada müzakirə olunub. Seysmokəşfiyyat işləri təbaşir çökmələrinin geoloji quruluşunun dəqiqləşdirilməsi və burada karbohidroden yığıntılarının aşkar edilməsi üçün aparılıb.
Bəyimdağ-Təkçay və Muradxanlı-Cəfərli-Ağaməmmədli-Qaralı sahələrində keyfiyyətli seysmokəşfiyyat göstəricilərinin əldə edilməsi 3000 kanal qəbul edən və təsbit edən sistemdən istifadə nəticəsində mümkün olub. Yeni FOUR-AC sistemi Amerikanın "Input/Output" şirkətindən alınıb.
Texniki Şurada digər perspektivli sahələrdə də 3D seysmokəşfiyyat işlərinin aparılmasına ehtiyac olduğu müəyyənləşdirilib.