Azərbaycan, Bakı, 22 oktyabr/ Trend , müxbir S.Əliyev/ Bakı - Supsa boru kəmərində bütün işlər başa çatdırılıb və o, istismara tam hazırdır, - boru kəmərini idarə edən Azərbaycan Beynəlxalq Əməliyyat Şirkətinin operatoru BP Azerbaijan şirkətindən çərşənbə günü bildiriblər.
SOCAR şirkəti (Azərbaycanın Dövlət Neft Şirkəti) noyabrın 11-12 - də bu maşrutla özünün 600 min barel həcmində (iki il ərzində birinci) neft partiyasını göndərmək niyyətindədir.
"Bakı - Supsa neft kəməri onun Gürcüstan sahəsinin yoxlanılması və təhlükəsizliyi haqqında zəmanətlər təqdim edildikdən sonra işləməyə başlayacaq", - SOCAR - ın prezidenti Rövnəq Abudllayev əvvəllər bildirib.
BP şirkəti gürcü-osetin münaqişəsi ilə əlaqədar, avqustun əvvəlində Bakı - Supsa boru kəmərinin (Supsa Gürcüstanın Qara dəniz sahilində yerləşir) doldurulmasını dayandırıb.
Neft kəməri 2006-cı ilin sonundan təmirdə olub. Cari ilin ortasında bu boru kəmərinin neftlə doldurulmasına başlanılsa da, gürcü-osetin münaqişəsi ilə əlaqədar proses dayandırılıb.
Bakı - Supsa boru kəmərinin operatoru Azərbaycan Beynəlxalq Əməliyyat Şirkətidir (ABƏŞ). Bakı-Supsa boru kəməri işini dayandıranadək bu marşrutla ABƏŞ-in "Azəri - Çıraq - Günəşli" yataqları blokundan hasil etdiyi yüngül neft nəql edilib.
Müəlliflə əlaqə saxlamaq üçün elektron ünvan: [email protected]