Qazaxstan, Astana, 27 fevral / Trend , müxbir K.Arınova /
KEGOC SC-nin vitse-prezidenti Valeri Li Astanada brifinq zamanı jurnalistlərə bildirib ki, Qazaxıstanın Mərkəzi Asiyanın birləşmiş enerji sistemindən çıxması müvəqqəti xarakter daşıyır.
"Mərkəzi Asiya ölkələri ilə mövcud olduğumuz birgə paralellərdən çıxmağımız məcburi tədbirdir və aprelin 15-dək davam edəcək", - Li deyib.
Dünən Qazaxıstanın vahid enerji sistemi Mərkəzi Asiyanın birləşmiş enerji sistemi ilə (BES) müstəqil iş rejiminə keçib. Buna səbəb isə Tacikistan enerji sisteminin plandankənar enerjidən istifadəsidir.
KEGOC-un vitse-prezidentinin sözlərinə görə, Tacikistan tərəfinin plandankənar elektrik enerjisindən yararlanması 26 fevral tarixinədək 100 mln. kVT/saat təşkil edib.
Yaranmış vəziyyət ona gətirib çıxarıb ki, paralel rejimdə fəaliyyət zamanı ölkənin cənub regionları olan Almatı, Jambul, Qızılorda və Şımkenddə istifadəçilər dəfələrlə elektrik enerjisiz qalırıblar.
Vitse-prezident onu da əlavə edib ki, ölkənin cənubu 250 MVt, mərkəzi regionları isə 100 MVt kəsirlə elektrik enerjisi ala biliblər.
"Sistemdən çıxmasaydıq bu, Qazaxıstanın kütləvi şəkildə enerjisiz qalması ilə nəticələnəcəkdi. Biz də sistem operatoru olaraq istifadəçilərimiz qarşısında məhsuliyyətimizi dərk edib paralel sistemdən çıxmaq qərarına gəldik", - Li qeyd edib.
Qazaxıstanın sistemdən çıxması ilə Tacikistanda vəziyyət ağırlaşmayacaqmı - sualına, Li cavab verib ki, "Paradoksal olsa da, mövcud vəziyyət Tacikistanın problemini həll etməyə kömək edəcək. Tacikistanda yaranmış kəsir elektrik enerjisinin bir hissəsini Özbəkistan və Türkmənistandan alması ilə əlaqədardır və bizim sistemdən çıxmağımız Mərkəzi Asiya ölkələri arasında enerji ilə bağlı gərginliyi bir qədər azaldar".
Vitse-prezident oxşar vəziyyətin 2001-ci ildə də yarandığını qeyd edib. "Son on il ərzində Qazaxıstan ikinci dəfədir ki, Mərkəzi Asiyanın birləşmiş enerji sistemindən çıxır", - Li vurğulayıb.
Məqalə müəllifi ilə əlaqə ünvanı: [email protected]