Azərbaycan, Bakı, 19 mart / Trend /
"BP tərəfindən 2008-ci ildə Azərbaycanda istehsal edilmiş neft ekvivalentinin xalis payı sutkada 130 min barel təşkil edib ki, bu da 2007-ci ilin analoji dövründən 40 faiz azdır", - BP-nin rəsmi saytında yerləşdirilmiş şirkətin 2008-ci il üçün hesabatında deyilir. Bu neft ekvivalenti özündə Azərbaycanın "Azəri-Çıraq-Günəşli" və "Şahdəniz" yataqlarından əldə olunmuş neft, qaz və kondensat hasilatını ehtiva edir.
Azalmanın əsas səbəbi "Azəri-Çıraq-Günəşli" yataqları (operator BP) üzrə PSA layihəsinə əsasən neftin pay bölgüsünü dəyişdirən neftin yüksək qiyməti olub.
Hesabatda deyilir ki, "Azəri-Çıraq-Günəşli" yatağında BP-nin payına düşmüş xalis neft payı 2008-ci ildə sutkada 97 min barel təşkil edib. 2007-ci ildə bu rəqəm 200 min, 2006-cı ildə isə 145 min barel olub.
"Şahdəniz" yatağında BP-nin payına düşmüş xalis neft payı 2008-ci ildə sutkada 8 min barel təşkil edib. 2007-ci ildə bu rəqəm 5 min barel olub.
"Şahdəniz" yatağında BP-nin payına düşmüş xalis qaz payı 2008-ci ildə sutkada 4 milyon kubmetr olub. 2007-ci ildə bu rəqəm 2 milyon kubmetrə bərabər olub.
"Azəri-Çıraq-Günəşli" layihəsi üzrə birgə işləmə və hasilatın pay bölgüsü barədə razılıq 1994-cü ilin sentyabrında imzalanıb. Müqavilənin fəaliyyət müdəti 30 ildir. "Çıraq" yatağında hasilat 1997-ci ildə, "Mərkəzi Azəri"də 2005-ci ilin əvvəlində, "Qərbi Azəri"də 2006-cı ilin əvvəlində, "Şərqi Azəri"də isə 2006-cı ilin sonunda başlanıb. 2008-ci ilin aprel ayının sonunda "Günəşli" yatağının dərin su hissələrində hasilata başlanıb.
AÇG layihəsi üzrə tərəfdaşlar: BP (operator- 34,1%), ChevronTexaco (10, 2%), SOCAR (10%), İNPEX (10%), Statoil (8,6%), ExxonMobil (8 %), TRAO (6,8 %), Devon (5,6 %), ITOCHU (3,9 %), Hess (2,7%). Kapital qoyuluşunun həcmi təxminən 20 milyard dollardır.
"Şahdəniz" yatağının işlənməsinə dair müqavilə 1996-cı il iyunun 4-də imzalanıb. Layihə iştirakçıları bunlardır: BP (operator) - 25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO- 9 faiz, SOCAR - 10 faiz.
Yatağın ilkin işlənmə mərhələsi çərçivəsində ildə 9 milyard kubmetr qaz hasil etmək nəzərdə tutulur. Layihənin həyata keçirilməsi üzrə 2014-2015-cü illərdə başlayacaq ikinci mərhələsi çərçivəsində hasilat 20 milyard kubmetrə qədər artırılacaq.
Məqalə müəllifi ilə əlaqə ünvanı: [email protected]