Azərbaycan, Bakı, 16 sentyabr / Trend , müxbir E.İsmayılov /
Avropa Azərbaycan qazının alınması məsələsini ləngitsə, Xəzər dənizindən qaz birdəfəlik Asiyaya nəql olunacaq. Bu barədə çərşənbə günü ARDNŞ-nin yüksək rütbəli nümayəndəsi bildirib. Bir müddət əvvəl Qazaxıstanın "KazMunayQaz" şirkətinin başçısı Kairgeldi Kabıldin Azərbaycan qazının Qazaxıstan infrastrukturundan istifadə edilərək Çinə tədarük edilməsi barədə bildirmişdi.
"Əgər bizim qazı tranzit ölkələrdən ötürmək variantımız yoxdursa və alıcılar Avropanın qaz əldə etməsi üçün bu şəraiti yaratmağa qərarlı deyillərsə, o zaman Asiya bu qazı ala bilər. Biz bu barədə üç il bundan öncə xəbərdarlıq etmişdik. Avropa bu məsələni uzun müddət ləngidərsə, Xəzər qazı birdəfəlik Asiyaya satıla bilər. Bu göründüyündən də ciddidir", - ARDNŞ nümayəndəsi bildirib.
O həmçinin qeyd edib ki, hələlik Azərbaycan qazının prioritet nəqli istiqaməti əvvəlki kimi Avropa hesab olunur.
ARDNŞ nümayəndəsinin qeyd etdiyi kimi, əgər real Orta Asiya qiymətlərini Avropada sıfır satış qiyməti ilə (çünki Avropaya bu qazı tədarük etmək mümkün deyil) müqayisə etsək, o zaman bu qazı orta qiymətə satmaq daha yaxşıdır.
Onun dediyi kimi, Çin qaza böyük tələbatı olan ölkədir və qazın alınması üçün bazarlar axtarır. Qazaxıstandan qaz kəmərinin çəkilməsi variantı da var. Eyni zamanda, Türkmənistan ərazisindən keçməklə nəqlin həyata keçirilməsi məsələsi də var. Türkmənistan-Çin borukəməri artıq bu ilin dekabrında hazır olacaq. "Türkmənistanla aramızdakı məsafə isə 150 kilometr təşkil edir" , - ARDNŞ nümayəndəsi bildirib.
Məqalə müəllifi ilə əlaqə ünvanı: [email protected]