Azərbaycan, Bakı, 25 noyabr / Trend , müxbir İ.Xəlilova/
Azərbaycan Respublikası Dövlət Neft Fondunun (ARDNF) "Bakı-Tbilisi-Ceyhan" (BTC) neft kəməri layihəsində Azərbaycanın iştirak payının maliyyələşməsinə sərf etdiyi vəsait 297,8 milyon manat (312,6 milyon dollar) təşkil edib. Bu barədə Fondun icraçı direktoru Şahmar Mövsümov Vergilər Nazirliyinin "Vergilər" qəzetinə verdyi müsahibəsində deyib. Bu xərcləmələr 2002-ci ildən 2006-cı ilədək olan dövrdə həyata keçirilib.
"Xəzər və Aralıq dənizini birləşdirən enerji dəhlizinin fəaliyyətə başlaması nəticəsində neftin dünya bazarlarına geniş həcmdə daxil olub və ölkə iqtisadiyyatının inkişafı üçün imkanlar yaranıb", - Mövsümov deyib.
Onun sözlərinə görə, boru kəmərinin istismara başlanması ilə Azərbaycanla çoxvariantlı ixrac strategiyası üçün imkanlar yaranıb və ölkənin tranzit potensialı bir neçə dəfə artıb.
Boru kəmərinin buraxılma gücü ildə 50 milyon ton neft təşkil edir. Neft kəmərinin inşasına sərf edilən vəsait isə 2,977 milyard dollar təşkil edir.
Boru kəməri 3 ölkədən - Azərbaycan, Gürcüstan və Türkiyədən keçir. BTC boru kəmərinin ümumi uzunluğu 1768 kilometrdir. Bunun 443 kilometri Azərbaycan, 249 km-i Gürcüstan, 1076 km-i isə Türkiyə ərazisindən keçir.
BTC Co-nun səhmdarları aşağıdakılardır: BP (30,1%); AzBTC (25%); Chevron (8,90%); Statoil (8,71%); ТРАО (6,53%); Eni (5%); Total (5%); Itochu (3,40%); Inpex (2,50%); ConocoPhillips (2,50%) və Amerada Hess (2,36%).
Neft satışından əldə edilən gəlirdən ARDNŞ-nin payına düşən hissədən 2003-cü ilədək 102 312 436,24 dollar ARDNF-nin hesabına toplanırdı. Dövlət başçısının sərəncamı ilə bu vəsait ARDNŞ-nin hesabına qaytarılıb.
2009-cu il 31 oktyabra olan vəziyyətinə görə ARDNF-nin aktivləri 14,2 milyard dollar təşkil edib.
Noyabrın 25-nə olan cari məzənnə 0,8025 AZN/USD təşkil edir.
Məqalə müəllifi ilə əlaqə ünvanı: [email protected]
