Azərbaycan, Bakı, 13 aprel /Trend/
ARDNŞ yanvar-mart aylarında Bakı-Supsa boru kəməri vasitəsilə "Azəri-Çıraq-Günəşli" yataqlarından hasil edilən 811,96 min tona yaxın yüngül Azərbaycan nefti ixrac edib. 2009-cu ilin yanvar-mart aylarında bu göstərici 793 min ton olub. Bu barədə ARDNŞ-in Marketinq və İqtisadi Əməliyyatlar İdarəsindən verilən məlumatda deyilir.
ARDNŞ 2009-cu ildə Bakı-Supsa boru kəməri vasitəsilə 2,8 milyon ton neft ixrac edib. 2008-ci ildə bu göstərici 407,1 min ton olub.
2007-ci ildə boru kəmərində aparılan təmir işlərinə görə bu istiqamətdə yüklənmə olmayıb. 2008-ci ilin ortalarında bu boru kəmərinə neft doldurulsa da, gürcü-osetin münaqişəsi səbəbindən bu proses dayandırılıb. Bu boru kəməri vasitəsilə nəqletmə 2008-ci il noyabrın əvvəllərində bərpa edilib.
Bakı-Supsa boru kəmərinin operatoru BP şirkətidir.