Azərbaycan, Bakı, 30 iyun /Trend/
Azərbaycan və Yunanıstan Azərbaycan qazının Yunanıstana birbaşa tədarükü üzrə danışıqlara başlamaq barədə razılığa gəliblər. Bu barədə yunan mətbuatı yazıb. 2007-ci ildə Azərbaycan və Yunanıstan arasında qaz tədarükü barədə memorandum imzalanıb. Lakin Azərbaycan və Türkiyə arasında tranzit razılaşmanın olmaması səbəbindən tədarük həyata keçirilməmişdi. İunun əvvəlində Azərbaycan və Türkiyə tranzit razılaşma imzalayıblar. Bu, Azərbaycan qazının Yunanıstan və Türkiyə arasındakı birləşdirici qaz boru kəməri vasitəsilə tədarükünə imkan yaradır.
Birbaşa qaz tədarükü ilə bağlı danışıqların başlanması haqqında razılığa Yunanıstanın ətraf mühit və iqlim dəyişiklikləri naziri Tina Birbili və Azərbaycanın sənaye və energetika naziri Natiq Əliyev Afinada keçirilən "Aralıq dənizinin nefti və qazı" konfransında gəliblər.
Tərəflər qaz sahəsində ikitərəfli münasibətlərin gələcəkdə möhkəmləndirilməsi və Azərbaycandan təbii qazın birbaşa alınması üçün əsasın yaradılması ilə bağlı razılığa da gəliblər.
Hazırda Afina təbii qazı Rusiya və Türkiyədən alır. Türkiyədən Yunanıstana isə Azərbaycandan alınan qaz satılır.