Azərbaycan, Bakı, 5 iyul /Trend, müxbir E.İsmayılov/
Çərşənbə günü Azərbaycan və Misir Bakıda tərəflər arasında enerji əməkdaşlığı perspektivlərini müzakirə edəcəklər. Bu barədə bazar ertəsi Azərbaycan Sənaye və Energetika Nazirliyinin mətbuat xidmətinin rəhbəri Azər Mənsimli deyib.
Onun sözlərinə görə, iyulun 7-də Bakıya Misir neft naziri Əmin Samih Fəhminin başçılıq etdiyi nümayəndə heyəti gələcək. Nümayəndə heyətinin tərkibinə nazirliyin nümayəndələri və Ölkə Milli Qaz Şirkətinin prezidenti Mahmud Lətif daxil olacaq.
Səfər zamanı Sənaye və Energetika Nazirliyində, İqtisadi İnkişaf Nazirliyində və habelə ARDNŞ-da əməkdaşlıqla bağlı danışıqlar aparılacaq.
Misir "Nabucco"nu qaz boru kəməri layihəsi üçün qaz mənbələrindən biri kimi nəzərdən keçirir. Azərbaycan da öz növbəsində, "Nabucco" layihəsində aparıcı ölkələr sırasındadır.
Dəyəri 7,9 mlrd avro olan "Nabucco" qaz kəməri ilə Azərbaycan və Mərkəzi Asiyadan Aİ ölkələrinə qaz ixrac etmək nəzərdə tutulur. Qaz kəmərinin çəkilişi 2011-ci ilə təyin edilib. İlk tədarüklərə 2014-cü ildə start veriləcək. Boru kəmərinin maksimal gücü ildə 31 milyard kubmetrə bərabərdir. Layihənin iştirakçıları Avstriyanın OMV, Macarıstanın MOL, Bolqarıstanın "Bulgargaz", Rumıniyanın "Transgaz", Türkiyənin "Botaş" və Almaniyanın RWE şirkətləridir. Onların hər biri bərabər paya - 16,67 faiz paya malikdir. Layihənin ümumi dəyərinin təxminən 30 faizi layihədə iştirak payı əsasında "Nabucco Gas Pipeline International"ın səhmdarları tərəfindən ödəniləcək, qalan 70 faizi isə kreditorların hesabına maliyyələşdiriləcək.
