"Azəri-Çıraq-Günəşli"də hasilatın artırılması layihəsi çərçivəsində hazırlıq işləri davam etdirilir
Azərbaycan, Bakı, 19 iyul /Trend/
"BOS Shelf" şirkəti Chirag oil project-in ("Azəri-Çıraq-Günəşli" dəniz yataqlar blokunda neft hasilatının artırılması) dayaq blokunun tikintisi çərçivəsində ARDNŞ-nin Heydər Əliyev adına Dərin Özüllər Zavodunda hazırlıq işlərini davam etdirir. Bu barədə bazar ertəsi müəssisədəki mənbə bildirib.
Hazırda 150 millimetr qalınlığında borular istehsal etməyə imkan verəcək yeni doğrayıcı dəzgahın montaj işləri aparılır. Əvvəllər zavodun imkanları 100 millimetr qalınlığında borular istehsal etməyə imkan verirdi. Mənbənin qeyd etdiyinə görə, bu, müəssisədəki beşinci doğrayıcı xətt olacaq.
Əvvəllər BP ("Azəri-Çıraq-Günəşli" yatağının operatoru) nümayəndələrinin dediyinə görə, Chirag oil project çərçivəsində işlərin çoxunun Azərbaycanda görülməsi planlaşdırılıb.
"Bos Shelf" "Azəri-Çıraq-Günəşli" layihəsi çərçivəsində BP şirkətinin dayaq bloklarının tikintisi üzrə podratçısıdır. Şirkət layihə çərçivəsində altı dayaq bloku tikib. İndi "Bos Shelf" daha bir blokun tikintisinə hazırlaşır. Bu müqavilənin dəyəri təxminən 215 milyon dollar təşkil edir.
Chirag oil project altı milyard dollar məbləğində sərmayəni nəzərdə tutur.
"Azəri-Çıraq-Günəşli"də neft hasilatının artırılması çərçivəsində tikiləcək yeni platformadan Azeri Light növlü neftin hasilatının sutkalıq həcminin 183 min barel təşkil edəcəyi planlaşdırılıb. Yeni platformadan sutkada 6,5 milyon kubmetr qazın hasil ediləcəyi gözlənilir. Platformada sutkalıq qaz vurulmasının həcminin təxminən 2,3 milyon kubmetr olacağı nəzərdə tutulub.
Layihə çərçivəsində qabaqlayıcı qazma işləri 2010-cu ilin ikinci, 2012-ci ilin birinci dövrünü əhatə edəcək. Qazma işləri "Dədə Qorqud" qurğusundan həyata keçiriləcək. Platformadan hasilat 2013-cu ilin sonuna planlaşdırılıb.
Layihənin realizəsi çərçivəsində (AÇG üzrə müqavilənin 2024-cü ilədək qüvvədəolma müddəti) ümumilikdə 300 milyon barel neftin hasil edilməsi planlaşdırılıb.
"Azəri-Çıraq-Günəşli" layihəsinin iştirakçıları aşağıdakılardır: bp (operator - 34,1367 faiz iştirak payı), ChevronTexaco (10,2814 faiz), ARDNŞ (10 faiz), INPEX (10 faiz), Statoyl (8,5633 faiz), ExxonMobil (8,006 faiz), TPAO (6,75 faiz), Devon Energy (5,6262 faiz), Itochu (3,9205 faiz), Delta Hess (2,7213 faiz).
