Аzərbaycan, Bakı, 28 iyul /Trend, müxbir S.Süleymanov/
ABŞ Mərkəzi Asiya qazının Çinə nəqlinin istiqamətləndirilməsinə qarşı deyil. Bu barədə çərşənbə günü Astanada ABŞ Dövlət Departamentinin Avrasiya enerji məsələləri üzrə xüsusi elçisi Riçard Morninqstar bildirib.
"Biz Çinə gedən qazın həcminin Qərbə gedən qazın həcmi ilə rəqabət aparacağını düşünmürük", - Morninqstar deyib.
Onun sözlərinə görə, qaz ehtiyatları həm Türkmənistan, həm Qazaxıstan, həm də Özbəkistanda kifayət qədərdir.
"Əgər bu ehtiyatlar artarsa, qazı həm Qərb, həm də Çinə nəql etməyə kifayət edəcək. Biz ümid edirik ki, həm Türkmənistan, həm də nə vaxtsa Qazaxıstan da Qərbə qaz nəqlinə başlayacaq", - Morninqstar deyib.
Onun sözlərinə görə, Çin nə qədər çox qazdan istifadə etsə, ölkədə bir o qədər az kömür işlənəcək ki, bu da ekologiyaya müsbət təsir edəcək. "Bununla yanaşı, əgər qaz Mərkəzi Asiya ölkələrindən Çinə nəql edilsə, bu o deməkdir ki, Avropaya gedə bilən digər qaz nəqli mənbələri azad olacaq", - Morninqstar bildirib.