Azərbaycan, Bakı, 4 mart /Trend/
"Azəri-Çıraq-Günəşli" yataqlar blokundan neft və səmt qazı, "Şahdəniz" qaz-kondensat yatağından isə qaz və kondensatın tədarük edildiyi Səngəçal neft terminalının ümumi texniki gücü 1,2 milyon barel neft və 39,5 milyon kubmetr qaz ("Şahdəniz" üçün 25,5 milyon kubmetr) təşkil edir. Trend-in məlumatına görə, bu barədə cümə günü BP şirkətinin (layihənin operatoru) məlumatında deyilir.
Qaz tədarükü Cənubi Qafqaz qaz kəməri (Bakı-Tbilisi-Ərzurum), neft tədarükü isə Bakı-Tbilisi-Ceyhan, Bakı-Supsa neft kəmərləri, eləcə də dəmiryolla həyata keçirilib.
ARDNŞ-nin (Azərbaycan Respublikası Dövlət Neft Şirkəti) qaz tədarükü terminalı respublikanın milli qazpaylayıcı sistemi ilə birləşdirən qaz kəməri vasitəsilə həyata keçirilir.
Ötən il ərzində Səngəçal neft terminalından "Şahdəniz"dən hasil edilən sutkada orta hesabla 18,7 milyon kubmetr qaz (sutkada 659 milyon kubmetr fut) qaz ixrac olunub.
2010-cu ildə Azərbaycanın "Şahdəniz" qaz-kondensat yatağından 6,9 milyard kubmetrə yaxın qaz və 1,9 milyon ton (14,7 milyon barel) kondensat hasil olunub. Ötən il yataqda orta sutkalıq hasilat 19 milyon kubmetr qaz və 40,2 min barel kondensat təşkil edib.
"Şahdəniz" yatağının işlənməsinin birinci mərhələsi çərçivəsində hasilatın ən yüksək həddi 8,6-9 milyard kubmetr səviyyəsində proqnozlaşdırılır. Proqnozlara görə, yatağın işlənməsinin ikinci mərhələsi çərçivəsində qaz hasilatı həcmini ildə 25 milyard kubmetrədək çatdırmaq mümkün olacaq.
"Şahdəniz" yatağının ehtiyatları 1,2 trilyon kubmetr qaz həcmində qiymətləndirilir.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, "Statoil" - 25,5%, NICO - 10%, "Total" - 10%, "LukAgip" - 10%, TPAO - 9%, ARDNŞ - 10%.
