Azərbaycan, Bakı, 23 avqust /Trend, müxbir E.İsmayılov/
Azərbaycan Nazirlər Kabinetinin "Azərbaycan Respublikasının yanacaqdoldurma məntəqələrində nəzarət-kassa aparatlarının tətbiqi haqqında" qərarına uyğun olaraq, ölkənin yanacağın pərakəndə satışı üzrə ən iri operatoru "Azpetrol" MMC 2012-ci il yanvarın 1-dək bütün yanacaqdoldurma məntəqələrində yeni aparatların tətbiqini təmin edəcək. Bu barədə çərşənbə axşamı Trend-ə "Azpetrol"un mətbuat xidmətinin rəhbəri Camal Zeynalov deyib.
"Azərbaycan Nazirlər Kabinetinin qərarına əsasən, şirkət tərəfindən artıq bütün yanacaqdoldurma məntəqələrində yeni aparatların gələn il yanvarın 1-dək tətbiq edilməsi barədə qərar qəbul edilib", - Zeynalov əlavə edib.
Hazırda "Azpetrol"un Azərbaycanda 70-dən çox yanacaqdoldurma məntəqəsi var. Bunun 66-sı benzin, 5-i isə qaz məntəqəsidir. Şirkətin avtomobil parkında 110 sisternli avtomobil var. Şirkətin işçilərinin ümumi sayı 2500 nəfərdir.
"SOCAR Petroleum"dan dediklərinə görə, şirkət yanacaqdoldurma məntəqələrində yeni aparatların tətbiqi ilə bağlı məlumatlandırılıb və o da hökumətin qərarını yerinə yetirməyə hazırdır.
"Respublikada yanacaqdoldurma məntəqələrinin sayı elə də çox deyil və ölkədə yeni kassa aparatları çətinlik olmadan hökumətin qoyduğu müddətdə tətbiq ediləcək", - şirkətdən bildiriblər.
"SOCAR Petroleum" hazırda Bakıda 10-dan çox yanacaqdoldurma məntəqəsinə malikdir. ARDNŞ ümumilikdə paytaxtda 26 yanacaqdoldurma məntəqəsi açmağı planlaşdırır. Ölkə üzrə yanacaqdoldurma məntəqələrinin sayını isə 80-100 ədədə çatdırılması nəzərdə tutulur.
Bundan əvvəl Azərbaycanın vergilər naziri Fazil Məmmədov "Azərbaycan Respublikasının yanacaqdoldurma məntəqələrində nəzarət-kassa aparatlarının tətbiqi haqqında" qərarın icrasının təmin edilməsi məqsədilə əmr imzalayıb.
Sənədə əsasən, 2012-ci il yanvar ayının 1-nə qədər hazırda Azərbaycan ərazisindəki yanacaqdoldurma məntəqələrində istifadədə olan nəzarət-kassa aparatlarının onların istehlakçıları tərəfindən Dövlət reyestrinə daxil edilmiş, xüsusi konstruksiyalı və texniki göstəricilərə malik, o cümlədən çek verilmədən neft məhsullarının və maye qazın alıcıya satılmasını (buraxılmasını) istisna (blokirovka) edən yeni nəzarət-kassa aparatları ilə əvəz olunması və onların qeydiyyata alınması ilə bağlı bir sıra işlərin həyata keçirilməsi nəzərdə tutulur.
Yeni nəzarət-kassa aparatlarının tətbiqi ilə əlaqədar görüləcək tədbirlərin qrafiki təsdiq edilib.
